【PUBG】男玩家入食雞Group被老婆誤會嫖妓 網民:彭于晏幫到你

撰文:
最後更新日期:

俗語話:「唔怕生壞命,最怕改錯名。」

《PUBG絕地求生》個名明明正正常常,但基於遊戲勝出後有「Winner Winner Chicken Dinner!!」一句,所以玩家們都幫呢隻game改咗個花名叫做「食雞」,仲同好多兄弟、機友一齊開WhatsApp Group約埋「食雞」。

問題就嚟喇!有男網友指被兄弟add咗入「食雞團」,點知佢老婆見到「食雞團」呢3個字之後嬲到癲,以為老公北上嫖妓,於是執晒衫褲鞋襪返娘家。該男網友於是喺「食雞團」話:「呢個Group可唔可以改名?我老婆以為我有個叫雞團,而家嬲到返咗娘家……」之後佢仲想廣集大家意見問點樣拆解今次嘅離婚危機。

呢鋪危機點拆好呢?有人指搵彭于晏幫口就得。(網上截圖)

對於呢次「打咗鋪機,輸咗頭家」慘劇,個老公看似水洗都唔清,但有好多網民都叫佢放心,仲好抵死咁建議:「同你老婆食返兩鋪雞佢就明架喇!話唔定到時佢食得仲狼過你。」此外,亦有人指:「呢個世界或者只有彭于晏先幫到你,只要彭于晏開口解釋咩係『食雞』,你老婆一定會信!」

點解搵彭于晏幫口解釋『食雞』呀?其實好簡單啫,因為彭于晏幫《PUBG絕地求生》拍咗個代言廣告,喺廣告片入面成日「食雞」前、「食雞」後吖嘛:「大家好我是Eddie彭于晏。在這兒,無論你是高手還是菜鳥都能找到屬於自己的樂趣。各就各位,一起吃雞。」

再唔係就直接俾老婆睇以下一篇文,直接了當講清楚「食雞」唔係叫雞:

【PUBG吃雞】彭于晏做代言全球大熱 鹿晗吳亦凡林俊杰都係fans

連華人界巨星們都「食雞」,老婆們可以安心啦。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。