【逆緣．專訪】黎諾懿沉十年再上位 知自己位置：最緊要去到終點
黎諾懿喺劇集《逆緣》裡面同夏文汐嘅忘年戀令好多觀眾都好深刻，而其實之前佢演過唔少幾正嘅角色，包括《燦爛的外母》嘅SM王、《愛‧回家》嘅馬壯同埋15年前首次做男一嘅《當四葉草碰上劍尖時》角色。不過，諗深一層，佢兩次做男一嘅時間真係隔咗好耐，期間同佢一齊做「奧運六星」嘅林峯、吳卓羲、黃宗澤等已經做咗好多次男一，仲上哂神枱添，睇嚟佢真係慢咗好多拍咁。黎諾懿接受《香港01》訪問時，就話「最緊要去到終點啫」，亦承認以前嘅少不更事，令佢冇辦法同其餘五星同時跑出：「我後生時真係好多嘢唔識，無論待人處事、做戲，所有嘢都有唔妥善嘅地方。可能好多人都有幫過我，但係以前嘅年少氣盛，令到佢哋都唔繼續幫。」
【逆緣．專訪】黎諾懿馬壯味濃難辟味？ 「我同佢一樣貪玩賴皮」
諾懿回想返以前，都覺得自己真係當時自視過高：「我以為做到『六星』後前路會一片光明，所以目空一切，搞到唔識珍惜。入咗TVB一兩年，就已經有得做《四葉草》主角，好快就做『六星』，覺得所有嘢都係必然，以為自己跟住就係做劉德華、梁朝偉，就算唔係我都係苗僑偉。側邊又好多人同我講，我係下一個古天樂。」但諾懿好快就遇到挫折，雖然一直有人支持佢，但好多人都係見到佢咁就一沉百踩：「上得咁快好快就出事，觀眾都唔知我做緊咩，我亦都冇實力孭得起一套劇，所以好快就入咗兒童組。」
有冇妒忌過林峯、吳卓羲可以上得咁順？諾懿好誠實：「我話冇就呃你嘅，以前會諗點解人哋上到我唔得，依家我會問返自己到底得唔得。阿峯去紅館，我會諗自己係咪會賣到飛，你叫我唱百幾首歌我都得，但係唔會有人睇，所以我會選擇返啲呢個階段做嘅嘢，咁樣實際得多。人哋得，係人哋有才能、天分，我冇呢啲嘢就要打好根基，希望有一日可以做到佢哋咁，如果做唔到都冇辦法，因為唔係話學就學到，唔係1+1=2咁簡單嘅事，而我想大家鍾意我係冇一個直接嘅答案。」
諾懿亦都好真心欣賞林峯、吳卓羲等人，仲覺得林峯係當中最好全面嘅一個：「唱歌跳舞做戲，無論有冇離開到TVB，佢都可以話係首屈一指，佢個樣又小生樣，我自己係做唔到，我音樂感好差，五音不全，真係要講才能，好多嘢要追趕，年紀開始長大，真係覺得以前嘥咗好多時間，依家會諗點解我唔好好學好普通話，依家學又覺得好難搞，但就算講得差，我都會講，因為點都要踏出第一步。」
雖然被經歷磨走咗驕傲自大，但諾懿就話自己嘅鬥心從來未被磨走到：「依家係睇嘢唔同咗，以前心口掛住個勇字，又或者做一啲與別不同、自以為係啱嘅嘢，依家成熟咗，唔會做碰釘嘅嘢，每件事深思熟慮。你問我想唔想攞獎？我答你絕對想。咁想唔想做視帝？絕對想。不過，自己一定要有實力，如果唔係大家就唔會認同你，畀咗個獎你就引人嚟鬧，我會寧願成世都冇獎，因為觀眾嘅眼光係雪亮，會識比較、會識評價你呢個人。」