【經常請吃飯的漂亮姐姐】擊中要害的女人AV　橋唔怕舊最緊要受

韓劇《經常請吃飯的漂亮姐姐》（밥 잘 사주는 예쁜 누나）近期人氣爆燈，男主角丁海寅迷倒老中青女士，不少男士都聽到另一半抱怨：「喂！你學吓個男主角得唔得？」、「點解人哋可以咁Perfect？靚仔專一又深情…」
還記得《來自星星的你》的都敏俊將「理想男友」標準拉到IFC咁高，「點解人哋有超能力你冇？」，相信問得出呢個問題嘅女士已中「Oppa毒」病入膏肓。
其實姊弟戀玩足咁多年，點解仲會咁受歡迎？正是「橋唔怕舊最緊要受」的永恆道理，劇情上花點心思，逐點擊中女性觀眾的要害，《經常請吃飯的漂亮姐姐》就像一部沒色情場面的女人AV，單憑以下幾招已足夠令女人興奮。

第一招／角色代入

各位在職場打拼的女士，對孫藝珍飾演的女主角或多或少有點代入感，在職場被上司欺壓、同事卸膊加埋食死貓，天下烏鴉一樣黑，有相同經歷的你，慢慢就當正自己是孫藝珍。加上渣男舊愛另結年輕新歡要分手，仲惡人先告狀，將女主角比作「無色無味」的魔芋，大言不慚地說「你已變成令他提不起興趣與性趣的女人」，姊妹們豈會唔睇到咬牙切齒。

第二招／鮮肉永恆

就如任何年齡的男士都愛Follow好身材的IG美女，女士對「小鮮肉」的抗拒力幾乎是零。男男女女都有性幻想，男士愛小蠻腰、長腿或胸前兩團肉；女士就靚仔、靚仔同靚仔，丁海寅算不上頂級美男，但女人喜歡的他都有，高大長腿，可愛又不失男人味，最重要是專一、溫柔、體貼、細心…現實中IG大胸女可能一街都係，但沒有多少個丁海寅般的小鮮肉存在。

第三招／慢慢來

說的不是男、女主角的進度，而是鏡頭的速度，須知道男與女要擦出愛火，本來就像煲老火湯般死滾爛滾，如微波爐叮一聲就著晒的情況其實更多。角色代入與鮮肉是硬件，軟實力是一件件令人心動的小事，用手機燈幫女主角開路、一把遮兩份擔，還有無數次你追我逐耍花槍，拍拖就是一起做無數生活瑣事，配以0.5倍速播放，慢慢將你帶入戲，以為自己真的跟丁海寅談戀愛。

呢幾幕真係睇到姐姐妹妹心跳加速！

第四招／樂而不淫

講明是女人AV，又怎能缺少床戲，電視劇當然不會出現Hardcore的性愛場面，要讓女觀眾興奮，一下十指緊扣、一句甜言蜜語，或是突如其來一下錫錫都足夠。劇中的床戲相當含蓄，不單烏燈黑火，連兩人四腿交纏的場面都沒有，但編劇很巧妙地安排男主角為女主角脫衣，就算明明不見肉體，卻比看到全裸還要興奮。

其實姊弟戀在韓劇來說已玩到爛，但同一條橋無論玩幾多次都有人睇，證明將舊元素重新整合都是創意。韓劇的製作質量是無可口非的，劇中的場景、造型及配樂都有心思，有男性朋友跟小編說，看預告覺得背景音樂好好聽而看了第一集，面對身經百戰的觀眾，任何細節位都可以成為致勝關鍵。

（觀看更多） 《經常請吃飯的漂亮姐姐》母狠摑孫藝珍　孖丁海寅情侶檔出席百想

下載《香港01》App，更多韓星靚相、影片率先睇！

http://bit.ly/hk01app

我哋01韓迷嘅facebook專頁Kpop 01已經開咗喇！想知道更多韓國娛樂、飲食、玩樂、時尚資訊，快啲去畀like啦：https://www.facebook.com/hk01.kpop/