譚詠麟作曲世界盃主題歌　十足《皆大歡喜》方便跳大媽舞？

第21屆世界盃即將於6月14日喺俄羅斯舉行，今屆就由ViuTV奪得獨家播放權，為咗令大家更加投入世界盃，ViuTV就特別邀請咗樂壇校長譚詠麟作曲同監製推出世界盃主題曲《我們的夢》，仲搵埋MC Jin填rap詞。除咗有鍾鎮濤、許志安、梁漢文、陳曉東之外，宇宙G.E.M.都有份飆高音，亦出動到環球旗下所有歌手，包括陳慧嫻、AGA、Gin Lee、Robynn & Kendy、周殷廷、麥家瑜、符致逸等，而和音就由明星足球隊同晨曦足球隊包辦。

但係首歌聽咗頭幾秒就已經覺得唔對路，諗住今年世界盃喺俄羅斯舉行，可能唔多唔少會有少許民族曲風，又或者會係節奏強勁聽完好熱血，好似李克勤首《Victory》或者《我著十號》咁。但係呢首《我們的夢》聽落覺得似70年代曲風帶點中國風，啲節奏啱晒大媽喺廣場跳十字步，感覺好親切，好似睇緊《皆大歡喜》咁，如果家燕姐一齊唱就perfect啦！歌詞亦好有校長嘅特色，不過最搶鏡嘅都係MC Jin rap嗰部份。

另外，主題曲都有邀請到俄羅斯籍嘅主持Artem Ansheles一齊唱，喺入面都加入咗幾句俄文。但係似乎大家都對呢首歌感覺麻麻，有唔少網民就留言話不如直接改編俄羅斯方塊首歌仲好，幫主題曲改名做《世界盃之皆大歡喜》之餘，仲話呢首歌根本要搵埋家燕姐唱。喺呢個時候，不如聽吓俄羅斯嘅世界盃主題曲對比吓啦！