【流行經典50年】關心妍唱《講不出聲》 網友:同關菊英出合唱版

撰文:洪曉璇
出版:更新:
關心妍而家大部分時間都用嚟湊女。(關心妍Facebook)

唔少女士本身事業發展一帆風順,為咗生兒育女決定急流勇退,將時間心機放曬喺小朋友身上,關心妍就係其中一個好例子,16年中誕下囡囡楊榮心後,Jade工作量大減專心相夫教女,以及出席慈善活動。呢日佢終於再亮相無綫節目《流行經典50年》,除咗一系列慘情金曲,居然獻唱關菊英經典名曲《講不出聲》,又令人諗起當年搶獎事年,乜咁大整蠱呀﹗

呢日重返電視獻唱,最大迴響嘅唔係佢嘅慘情歌系列,而係關菊英經典名曲《講不出聲》。(影片截圖)

2009年1月TVB舉行《2008年十大勁歌金曲頒獎典禮》,主持曾志偉同崔建邦宣布「年度傑出表現獎金獎」得主係關菊英,點知聽到個關字,Jade就一個箭步衝出嚟接過獎項,台上台下都一面錯愕。呢件勁尷尬嘅事令Jade個名以後都同菊姐剪不斷理還亂。

頒獎禮烏龍事件簿,呢一單絕對名列三甲。(影片截圖)

估唔到隔咗9年後,關心妍重返電視節目,除咗唱出自己嘅金曲《放生》、《優先訂座》、《你有心》,居然仲唱出關菊英經典名曲《講不出聲》﹗一邊聽到Jade悅耳嘅聲線唱出「講不出聲講不~出聲,任由自己~半夜驚醒」,個腦都不禁浮現當年搶獎嘅畫面,網友都話乜TVB咁大整蠱呀……其實《2015年十大勁歌金曲頒獎典禮》上,關心妍得獎時又遇著崔建邦做主持,接過獎座後Jade笑言「無搞錯喇今次,唔使擔心!」唔理係佢自己揀歌定被安排唱《講不出聲》,久休復出立即引起話題都未嘗唔係件好事。

2015年關心妍憑《關家姐》待獎時,都有幽自己一默。(影片截圖)