【100日】官恩娜為囡囡Aurélie舉行百日宴　一家四口合照首曝光

幸福人妻官恩娜成功達標三年抱兩，15年剖腹誕下囝囝Gabriel（BéBé G），今年初再誕下囡囡Aurélie（BéBé A），話咁快囡囡已經三個幾月大啦﹗呢日Ella喺IG上載相片及短片，原來佢同中法混血丈夫為BéBé A舉行百日宴，見到場地佈置相當華麗，睇相都知Ella花盡心思為囡囡炮製美好回憶，仲第一次公開一家四口合照。

【湊成好字】官恩娜宣布囡囡出世　Aurélie似足媽媽好標緻
 

Ella喺IG限時動態中放入多張相片，百日宴應該喺馬場進行，有一張BéBé G同表兄弟行出露天位置睇賽馬，手指指好似睇得明咁相當搞笑。場地佈置方面，背景用上歐式露台及雕花拱門，配以大量粉色系列花朵點綴，既可愛又華麗，背景板上兩個露台位置，放上BéBé A早前拍攝嘅初生嬰兒照，以及BéBé G親親妹妹嘅合照。

【小Model．多圖】官恩娜初生B女留倩影　BéBé A托頭微笑勁可愛
 

百日宴又點少得蛋糕呢，Ella捨棄近期大熱嘅獨角獸蛋糕，挑選一款白色金色作主調，配上粉紅色Garden rose裝飾，插住寫有「Aurélie 100DAYS」嘅蛋糕牌。當然唔少得就係佢地嘅全家幅啦，一家四口齊齊著上白色衫裙，產後Ella似乎已經開始修身，面尖尖好精神，不過而家湊住兩個小朋友，想聽佢復出唱歌可能大家仲要等下啦。