【24K Magic World Tour】Bruno Mars開騷入場必聽5首歌

Bruno Mars上個月開始咗亞洲巡迴演唱會，首先喺日本舉行首站，將演唱會變成一個大型復古R&B party，佢充滿張力嘅唱功同超凡嘅舞技令所有歌迷high爆全場。講到亞洲巡唱，點會少得香港站，佢相隔4年再次襲港，喺今個星期六、日喺亞洲博覽館舉行兩場演唱會。今次以《24K Magic》為主題，當然要聽熟先好入場，依加就挑選5首Bruno Mars嘅歌同大家熱個身！

Finesse

呢首個真係唔講得笑，Bruno Mars仲搵到Cardi B featuring，推出之後就創下美國電台播放率最高嘅歌！之前喺第60屆格林美頒獎典禮上表演跳唱《Finesse》，強勁嘅節奏一響起前奏就已經令到全場歌手企晒企身歡呼，而MV亦喺網上瘋傳，點擊率更高達4憶，我一聽到就想跳舞喇！！！

That’s What I Like

呢首歌真係唔聽唔得，除咗係專輯入面嘅主打歌，相信就算唔係Bruno Mars嘅歌迷都識唱，早前Bruno Mars喺格林美頒獎典禮上憑呢首歌仲奪得年度歌曲，贏埋同樣好hit嘅《Despacito》。另外，喺舊年Brit Awards上面Bruno Mars親自演繹呢首歌，無論唱功同舞技都超晒班，好帶動到現場氣氛！

24K Magic

作為一個流行歌手除咗要迎合大眾口味嘅同時要建立個人風格，而Bruno Mars就絕對做到呢一點。《24K Magic》呢首歌充滿住復古味，將60至80年代嘅disco funk音樂精華以流行音樂嘅形式呈現出嚟，絕對係必聽之選！

Versace On The Floor

聽完幾首快歌之後，聽返首抒情主打《Versace On The Floor》啦！呢首可以話係我全隻專輯入面最鍾意嘅歌，funky完都要抖抖，轉聽吓浪漫電音，細心聽埋啲歌詞真係冧晒，好聽到轉埋做電話鈴聲！再睇返舊年Bruno Mars喺Billboard Music Awards嘅現場演繹，嗰啲超高音同難到一個點嘅轉音，絕對唔係普通人可以唱到！

When I Was Your Man

逝去的愛總帶著遺憾，而《When I Was Your Man》就唱出錯過最愛嘅嗰種痛苦，同時悔恨回憶中嘅美好。成首歌隻只係得簡單嘅鋼琴聲，同Bruno Mars充滿情感嘅歌聲，直接唱到入心坎裡，聽到個心乸住乸住。