謝霆鋒爆出道被噓至今上台仲驚緊 打拍子其實避緊水樽
撰文：冼燕珊
出版：更新：
由謝霆鋒主持的ViuTV節目《鋒味前奏》逢星期六播出，嚟緊嗰集，謝霆鋒會教導演火火煮「黑松露炒飯」。愈簡單的菜式其實愈考功夫，霆鋒同火火分享心得，「竅妙係時間同溫度，我鍾意落鑊前，用手摵開啲飯，因為會容易炒好多，所以我炒飯經常戴住手套就係咁解。」
謝霆鋒教火火煮黑松露炒飯。
霆鋒炒咗一陣，火火就接手，點知佢個煎pan愈炒愈歪，之後成個煎pan離開咗個爐，霆鋒見到笑住話：「你移咗過嚟係冇火㗎。」火火話自己好多甩漏，問霆鋒人生入面有冇遇到啲好大嘅甩漏，令到佢好唔開心，霆鋒就話：「前一排我做咗個演出，出嚟個效果自己唔係好滿意，知道自己可以再做得好啲，一路喺架車度忟自己緊接去咗另一個活動，係煮嘢食。我一直喺度諗：『點解會咁？』、『好忟呀！』，帶住呢啲怒火入廚房，即刻切親手。」
一向對自己要求高嘅霆鋒,自爆早前因為唔滿意自己嘅演出而搞到之後煮餸切親手指。
火火繼續問霆鋒：「行煮嘢食呢條路，會唔會好崎嶇？有冇人冷言冷語：『你無端端煮咩嘢食啫？擺明玩玩吓啦！懶有型！』？」霆鋒話唔單止煮嘢食呢條路，佢出道頭四年已經崎嶇到不得了，「啱啱出嚟嘅時候俾人噓！噓咗四年，唱到今日，我而家上台都仲會驚㗎！嘩！大佬！我嗰陣時攞住個咪，個人喺度搖，我唔係搖緊拍子呀，我係避緊你哋啲水樽同熒光棒呀！已經係俾人鬧到去呢個地步，梗係見過啲水樽飛埋嚟先咁搖啦! 所以有啲乜嘢未經歷過吖。」
回想初出道被噓足四年, 兼畀人掟水樽同螢光捧, 霆鋒坦言到今時今日仲驚緊。
畀人噓又掟嘢，有冇因為呢啲事而喊先？霆鋒就話冇，不過就爆咗經理人霍汶希（Mani）因為佢而喊到豬頭咁，「我落台嘅時候，見到mani喊，喊到抽搐，所以我要更堅強。」
霆鋒被噓又被掟水樽，佢自己本人無喊，但經理人霍汶希就為佢喊到豬頭咁。(視覺中國)