【棟仁的時光.任噏亂評】三大原因致劇集低收 唐詩詠被劇本累死

撰文:
最後更新日期:

《棟仁的時光》終於迎來大結局,套劇好唔好睇相信大家心入面會有個答案,但有個標準就好客觀,叫做收視。 喺《棟仁的時光》之前,《翻生武林》係2018年收視暫時第二低的劇集(第一名係《無間道》),首兩星期只得23.4和21.8點,全劇平均22.25點。但《棟仁的時光》其實情況都類同,首兩周收視只有23.1和22.4點,睇個走勢都會繼續跌,雖然未必可以取代《無間道》全劇得21.67點的地位,但代替《翻生武林》成為第二低收視劇集就好大可能性。

《棟仁的時光》的確比想像中差。(劇照)

究竟咩事會搞到套劇咁?其實本身套劇嘅題材好好,一種會偷能力的超能力,近年外國英雄片盛行,當係超級英雄咁拍都係一條出路。可惜TVB根本無將重點放喺呢種能力身上,每次使用能力時都係輕輕帶過,更加唔好講用能力去做街頭英雄,俾佢對付得最多嘅奸角都只係許家傑,成套劇嘅重點原來唔喺最大嘅焦點度。另外劇集好唔好睇,最重要是追看性,本劇最大懸念,亦即是扣住觀眾嘅「勾」,就係阿Sam(楊潮凱飾)嘅失蹤,成套劇就係講唐詩詠揾失蹤老公,但劇集無放太多心思喺呢度,只係設計咗光酥伯伯(鄭敬基飾)原來係楊潮凱,喂!大佬,而家班師奶都睇美劇、韓劇,見過成千上萬嘅套路,睇兩集就知鄭敬基就係阿Sam啦,你唔會覺得會「嘩」一聲呀?所以早兩集穿橋,都無人喺網上討論,就知編劇呢個以為「驚世」佈局,係有幾失敗。

光酥伯伯呢個伏筆好唔伏。(劇照)

第二個原因,TVB依然唔可以甩走舊有嘅一套,就係有太多愛情線。主線係袁偉豪、唐詩詠和朱晨麗嘅三角戀,加埋唔存在嘅楊潮凱,錯綜複雜嘅愛情線係一貫TVB嘅手法。明嘅,其實《棟仁的時光》條橋係唔錯,但如果係一套5集劇,應該會好精彩,但20集就要利用愛情綫去拖,令到成套劇節奏好慢,5分鐘講完嘅劇情,用了多40分鐘去講(扣除三節廣告時段),所以有不少網友都話《棟仁的時光》最好睇係臨尾5分鐘。

係都要加愛情線。(劇照)

其實《棟仁的時光》最大問題就係劇本,袁偉豪第二套擔正做男一嘅劇集,號召力沒有問題,之前《鐵馬戰車》施馬sir角色相當入屋,至於唐詩詠有人話佢未夠班做視后,話佢做嚟做去得一個樣,可能係大家潛移默化,覺得好戲就係喊到口水鼻涕出哂嚟,其實演得生活化先係最高難度,《棟仁的時光》致命傷係劇本冇張力、唔吸引,呢啲劇本就算你俾梁朝偉、張曼玉演都係死路一條。

袁豪偉同唐詩詠唔夠叫座力。(劇照)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。