【不愛我就拉倒】周杰倫新歌歌詞被指庸俗　背後其實蘊含重要訊息

《不愛我就拉倒》呢首周杰倫嘅新歌都真係幾令人又愛又恨，尋晚深夜出咗MV後，好多歌迷聽完都話曲調真係好好，特別係中間嘅Rap同鋼琴Solo勁有Feel，似返周董較早時期嘅風格，但係啲歌詞真係九唔搭八到一個極點，仲衰過《等你下課》，好似副歌裡面嘅「哥練的胸肌/如果你還想靠/好膽你就麥造」呢幾句咁，冇詩意之餘仲有啲Hea，所以好多人都叫周董不如搵返方文山填詞，唔好再自己上。不過，其實《不愛我就拉倒》呢首歌嘅歌詞背後係蘊含住一個好重要嘅訊息。順帶一提，「好膽你就麥造」，即係「夠膽你就咪走」咁解。

其實大家細心啲，一聽第一句就會發現到個端倪，首歌第一句係咁嘅：「寒流來了/剛好/剛好可以/把你手放外套」。相信呢一刻大家都Get到，呢首歌第一個詞語嘅真身係「韓流」，唔係我哋對眼睇到嘅「寒流」。你唔好以為我又亂吹呀，其實真係有根有據，首先「寒」同「韓」嘅發音喺國語裡面係一樣，其次之後嘅歌詞係確確實實對應到「韓流來了」呢個主題。

韓流喺2009年前後吹入大中華地區，更瘋魔萬千少男少女，喺佢哋嘅眼中周杰倫嘅歌曲就變得冇咁潮冇咁領先，亦變得唔貼近樂迷嘅口味。咁啱韓流吹來後嘅佢推出嘅《跨時代》、《驚嘆號》兩隻大碟都畀好多樂迷話水準下滑，所以佢喺歌詞都表達咗自己認同K-pop已經代替咗佢喺樂迷心目中嘅地位，先有K-pop代替佢「把安全帽戴好/不讓你在/愛情路上跌倒」呢句詞。嘗試改變曲風嘅周董，就因為咁而多咗創作快歌，但歌迷都唔係幾受落，所以就有「加速狂飆/你說不要/愛的險你不想冒」呢句。

周董曾經喺《等你下課》裡面向粉絲發問：「你耳機聽甚麼/能不能告訴我」，而其實《不愛我就拉倒》成首歌就係呢個問題嘅答案。知道大家依家聽緊K-pop嘅周董就喺新歌裡面同歌迷講，你鍾意聽我就繼續聽，唔鍾意聽我就咪聽，唔好用可憐佢嘅心態夾硬聽佢嘅歌，而佢自己會繼續做返周杰倫自己鍾意嘅音樂，「反正我又不是沒有人要」，同埋「你幸福就好」。仲係未信？聽多幾次啦！