當大家都討論緊26歲嘅汶萊四王子馬丁﹝Prince Mateen of Brunei﹞有幾咁大隻、個樣有幾咁親民、俘虜咗幾多少女嘅同時，唔好唔記得娛樂圈都有位「汶萊王子」，佢就係吳尊。吳尊顏值高已經唔需要多講，家族背景喺汶萊有錢有地位，同汶萊國王仲係世交！之前有唔少消息傳出話吳尊係汶萊王子，不過吳尊接受訪問時，就自爆差啲做咗汶萊王子，事緣係多年前國王妹妹曾經想由吳爸爸手上買走吳尊，因為皇室領養好多小朋友，不過慶幸爸爸冇答應。汶萊有馬丁王子，又有吳尊，有唔少女網民都話要嫁過去汶萊同王子瘋狂做gym，依家就睇吓居住汶萊有咩福利啦！

汶萊總面積5765平方公里，人口只有四十幾萬，主要靠海量嘅天然氣同石油為收入，更成為亞洲其中一個最富有嘅國家。講到人民福利，汶萊可以話係相當唔錯，好似教育咁，從幼稚園到大學畢業都唔需要花一分錢，如果想去外國留學都冇問題，政府會負責所有學費，同時生活費都唔使憂，連來回機票都買埋畀你。另外，就係醫療，如果入院，唔單止醫藥費，連手術費政府都會負責。買車買樓政府又會先補貼一半，其餘嘅申請貸款仲冇利息，最最最緊要就係唔使交稅添！據知汶萊公民分三個級別，最高級別就係黃色，但係外勞身分證就係綠色，福利係最少，住滿兩年就可以申請紅色身分證。至於點樣做到黃色身分證嘅公民，最快捷就係直接嫁過去汶萊，只需要等三個月同面試合格就搞掂！但係作為女性有一點要注意嘅就係，汶萊同馬來西亞一樣屬於伊斯蘭國家，所以女性係需要戴頭巾，但就唔使蒙面，無論福利有幾好，最緊要諗清楚啱啱自己。