【鹹豬踭批胸】《東張》利穎怡IG自爆曾中招:遇到呢啲情況要出聲

撰文:
最後更新日期:

無綫節目《東張西望》外景主持利穎怡(Joan)一向有正義感,早前佢採訪五月天演唱會開售時,就因為見到售票處職員就對排隊黨打尖視若無睹,而忍唔住為在場守規矩嘅五迷發聲。最近,網上瘋傳一段中年男人五秒內以批踭胸襲兩名少女嘅片,而Joan睇完之後都覺得好憤慨,仲喺社交網站分享自己被非禮嘅親身經歷,希望所有女士可以引以為鑑,必要時要大聲嗌唔好。

【東張西望】為五迷出頭 利穎怡被職員話多事:點解打尖嘅拎籌先

最近網上瘋傳一條中年男五秒內以批踭連向兩女抽水嘅片段。(網上圖片)

Joan喺自己嘅Instagram裡面就講返自己讀中學時,搭電車被男人批踭撞心口嘅經歷:「那時少女(Joan自己)不敢出聲,懷疑是不是叔叔不小心撞到呢,因為他每次撞到都在看著天花板,是不是錯覺?結果下車時少女跟姐姐說了,姐姐立刻走上踢他一腳再回來,叔叔沈默地回頭瞪兩姊妹。那時姐姐便說:『世上不會有那麼多不小心。電車上人不多他為什麼偏要擠到你身旁?撞你一下是不小心、撞你第二次就是故意。他不是心虛怎麼可能我踢他他都沒有罵我?!以後自己小心!我不是每次都在你身旁!』」之後Joan就意識到自己要學識保護自己。

利穎怡喺網上分享自己搭電車被男性抽水,之後胞姊為佢出頭嘅經歷。

講返條批踭片本身,Joan接受《香港01》訪問時直言,覺得片中兩位女士好似唔知自己被抽水咁:「睇佢哋啲反應好似唔多介懷咁,而我自己就係因為電車件事,先發現有啲男人諗唔好嘅嘢,之後就識得避開,我覺得女士們都應該主動同其他人保持距離,唔可以俾人任意批踭。」

「齋拍片其實冇用!」

講到條片淨係交代咗件事嘅發生,唔知到後續嘅情況,例如拍攝者最後有冇企出嚟指責嗰位色狼,Joan就話:「其實除咗拍片之外,我覺得睇到件事發生嘅人係應該上前同嗰位先生理論,因為齋拍片其實係冇用,阻止唔到佢繼續做落去。」咁應該點開口呢?佢就建議:「先生,我頭先見到你批踭撞幾個女仔心口喎!」咁如果嗰位男士死口唔認呢?Joan就話要咁應對:「同佢講有片有真相,拎條片出嚟咁佢對質。」

五月天演唱會門票開售當日,到場採訪嘅利穎怡眼見職員對排隊黨打尖視若無睹,便為五迷發聲。(電視畫面)

其實自為五迷發聲一事後,好多人都封Joan做正義女神,但佢就覺得呢個稱號對佢嚟講實在太過譽太誇張:「我只係覺得做女仔遇到呢啲情況真係要出聲,好多嘢真係唔係唔小心,有少少問題就要避開、望清楚,唔咁做,最蝕底就係自己。同埋我覺得我唔算好正義,純粹係覺得有啲嘢係唔啱要出聲,出聲都係為咗保護自己,唔關正唔正義事。」

雖然獲封為正義女神,但利穎怡就話自己孭唔起呢個稱號。

+12
+11
+10


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。