【逆緣】極速衰老明抄米路吉遜扮冷凍人? TVB又「撞」舊片橋段

撰文:
最後更新日期:

《逆緣》踏入結局階段,劇情愈來愈緊張刺激之餘,亦有好多謎團尚待解決。雖然剛剛就揭曉咗殺死陳山聰嘅兇手真正身份,但最近故事又揭示咗陳家樂嘅衰老速度比正常人快幾十倍,即將迎接生命終結,令大家更想知陳家樂最後會點。一直以來,好多觀眾話冷凍人解凍後嘅生活呢個Concept係「參考」超級英雄片《美國隊長》系列,但其實陳家樂條線嘅佈局比起《美國隊長》系列,更似由米路吉遜(Mel Gibson)主演嘅《Forever Young》,而且內容仲有八成相同,或者呢套舊荷里活戲可以揭示到《逆緣》之後嘅故事發展。

《逆緣》裡面陳家樂條線,同1992上映、米路吉遜主演嘅荷里活片《Forever Young》結構極度相似,好難唔想像到前者有「參考」後者。(網上圖片)

米路吉遜喺1992年上映嘅《Forever Young》裡面,因為女友伊沙貝格拉瑟(Isabel Glasser)撞車昏迷變植物人,萬念俱灰嘅佢就決定接受冷凍實驗,暫時自己生命。不過,米路吉遜並冇照原定計畫咁一年後甦醒,反而係到咗1992年先由兩個無意中闖入實驗室嘅小朋友喚醒。其後,快速衰老嘅米路吉遜同新相識嘅女性朋友(即係其中一個小朋友嘅媽咪)四出找尋當年嘅實驗團隊以及研究計劃,但係完全徒勞無功。不過,米路吉遜意外地發現女友冇死到,亦搵到對方嘅下落。最後,已成老人嘅米路吉遜同伊沙貝格拉瑟再次相遇,而女方應承男方嘅求婚。

由冰封後再機緣巧合下被解封,到主角身體機能急速衰老同與情人重逢,《逆緣》同《Forever Young》就算唔係一模一樣,都有八成相似。(電影畫面)

+18
+17
+16

雖然《逆緣》花咗好大篇幅去講講黎耀祥點樣做神棍斂財,但係對於觀眾嚟講最新鮮最養眼都係靚仔陳家樂嗰條線,當中仲有人覺得呢條線先至係主線。呢條線一開始就係陳家樂機緣巧合下喺防空洞嘅冷凍室裡面甦醒,之後佢就四出找尋失散多年、由湯洛雯飾演嘅老婆,經過一啲錯摸後佢就開始拋低往日嘅事,去接受中日混血兒林夏薇並與之發展。當大家以為佢哋會開花結果時,就無啦啦爆出陳家樂正在急速老化,加上最近嘅劇透就預告咗湯洛雯會再度亮相,即使大家仲未確定到湯洛雯係真係另一個角色,還是明明係老婆卻扮新身份,但結構上、轉折點上都可以話《Forever Young》極度相似,只係細節位有所不同咁。

湯洛雯喺《逆緣》第34集裡再度亮相,到底真正身份係邊個,係陳家樂嘅元配夫人,定係另外一個角色,未到結局都冇一個好肯定嘅答案。

或者我哋可以用《Forever Young》嘅情節去估計《逆緣》嘅最後發展。當陳家樂與湯洛雯「重逢」後,陳家樂有唔細嘅機會搵方法同湯洛雯「再續前緣」,甚至求多次婚,兜口兜面同林夏薇講Bye Bye。不過,如果最後真係咁,又真係幾令人失望,畢竟我哋睇住陳家樂同林夏薇由誤會到相識相知,之後發展成情侶,有個感情喺度,同埋咁搞法真係十成十抄《Forever Young》,難睇。為咗探求真相,早一步知道個結局,清楚監製王心慰(Amy)一向口密嘅我,就向一班公關妹妹埋手,睇下會唔會收到咩風,點知其中一位就話:「Amy姐唔肯爆呀,話條橋一講就穿,總之觀眾睇完會有個想像空間。(咁陳家樂最後係同邊個一齊?)應該就係林夏薇嘅。」又有想像空間,又應該同林夏薇,真係好難觸摸。

雖然從公關口中得知,陳家樂最後「應該」會情歸林夏薇,但都唔係一個確定嘅答案。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。