謝霆鋒傳授獨門煮麵法 勁多騎呢位兼爆粗:fxxking delicious!

撰文:
最後更新日期:
肚餓呀?煮個麵你食呀﹗(影片截圖)
「你肚餓呀?煮個麵你食呀。」香港人出名極愛食即食麵,總有幾包看門口,仲要日日都有獨門煮麵秘方添﹗湯料放碗定落埋水、麵使唔使過冷河?講真無絕對答案,最緊要自己啱食。謝霆鋒近年每次以Chef Lemon身份示人,都為大家帶來好多驚喜,呢日佢拍片推介自家新研發嘅拌麵,霆鋒話:「正如煎牛扒大家都係一塊牛一個煎pan點解可以咁唔同?今日就示範我自己嘅標準﹗」網友睇完都覺得,真係好多個位值得深入討論。
有Chef Lemon親自下煮,呢碗面已經升價十倍啦。(影片截圖)
Chef Lemon獨門煮麵法,首先要好猛火煲到水滾落麵,不過佢話:「我接受唔到而家呢種澱粉爆發情況」然後,倒咗三分一杯凍水入去,又要默默等水滾啦,呢個時候正好走去切下鮑魚切下蔥。另外原來煮麵都仲要試麵架噃,Chef Lemon夾起一條麵,用手指一撳,條麵條斷得好乾淨,就係佢鍾意食嘅質感啦。睇到呢度網友已經十萬個問號,留言話:「點解咁似整負離子直髮拎一條頭髮出黎咁check?」、「滾完又落凍水,過冷河都唔係咁過啦下嗎﹗」
拎一條出嚟試下質地,網友話同整負離子時感覺好似。(影片截圖)
一向好有個人風格嘅Chef Lemon,話明分享個人標準呀嗎:「撈麵如果姿姿整整攪太耐嘅嘅話,會涼得好快(唔好食)。」不過網友就發現,Lemon撈好麵放完鮑魚,由拎起樽櫻花蝦醬、到夾出大大隻蝦到放上麵講句完成,足足用咗20秒。睇完2分半鐘嘅教學分享,網友大多感到無言:「未睇之前以為佢係教人點調醬整撈面!睇咗原來係即食撈面……」話晒係國際知名大廚,霆鋒食完一啖仲爆粗話:「is fxxking delicious﹗」不如俾次機會,跟住Chef Lemon煮完一次再評價啦。
如果XO醬需要逐粒逐條夾出嚟,撈麵應該都變冷麵啦。(影片截圖)
+10
+9
+8


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。