【深宮計】有份擔正冇得宣傳 周秀娜靠自己用社交平台造勢
撰文：賴家杰
出版：更新：
周秀娜今日（5月17日）出席電訊盈科嘅手機App發布會，因為世界盃下個月就開鑼喇，娜姐都講到可以用呢個App睇到，問到娜姐平時其實係咪一個「低頭族」，因為成日都掛住玩手機，娜姐回答到：「其實都係㗎，宜家呢個年代每個人都會玩手機，然後送咗部手機畀父母之後，佢地就機不離身，我有少少後悔。」
周秀娜表示自己係一名正宗「低頭族」，但係街上面就絕不能玩電話，因為會成日仆親。（吳子生攝）
講到近日娜姐就被宣告冇得出席《深宮計2宮心計》嘅宣傳活動，因為佢自己所屬嘅公司正在與TVB打官司，所以令到佢所有宣傳活動都不能出席，對於呢一點娜姐都表示可惜：「因為部劇其實大家都拍得好辛苦，自己都係第一次同Tvb合作拍劇，好想盡力做好宣傳令觀眾喜歡，但冇辦法，因為係公司同TVB之間嘅事情自己都干預唔到太多，但都好放心，因為小青姐都承諾冇刪減我嘅戲份。」
但娜姐自己都講到會係自己個人社交網站宣傳呢一部劇，會唔會怕自己公司禁止佢宣傳？娜姐答到：「自己社交網站就真係好個人，都好有自己自主權嘅，我只希望呢部劇岀到嚟大家做好佢嘅宣傳啦。」
周秀娜有份演出的劇集【深宮計】的宣傳因公司關係不能出席，唯有靠自己社交平台。（吳子生攝）
生日冇人約：「你係咪想約我？」
過幾日就係娜姐嘅生日（5月22日），大家都知道佢係一個事業心好重嘅人，佢都回答到個日係要拍戲渡過，5月底先可以約朋友食飯。但單身已經好耐嘅娜姐會唔會都想願望搵番個男朋友，又或者個日有男仔約佢？娜姐就回應：「冇人約呀，你係咪想約我，冇呀，其實都係一大班朋友，有男有女，冇特別諗呢一方面。」
周秀娜生日冇男性相約，反問記者是否約佢？（吳子生攝）