【早霸王】速食男表白慘遭食檸檬 森美:女仔刁僑扭擰係應該

撰文:
最後更新日期:

由IG到傾電話再出街睇戲然後拖手兼錫埋,過程只不過係一星期,但堅持唔肯承認男女朋友關係,森美覺得喺呢個年代發生係好正常。(網上圖片)

每逄星期五,又係《早霸王》的「你知道唔知道有人掛住你」環節,已連續幾個星期都係「成功案例」,甚至有女仔同暗戀對象講「表白一定要經《早霸王》」,之不過,今日打去節目的Nikson就無咁好彩啦。
 

森美仲話而家女仔好多時都係怕悶,希望隨時有人可以陪食飯同傾電話。(網上圖片)

Nikson表示自己在IG上認識了阿恩,且好快就已經得到對方電話號碼,傾咗一星期電話後,隨即邀約對方出嚟睇戲,都唔知Nikson係有心定無意,揀咗套《無聲絕境》,所以在過程中,發生了「睇睇下佢驚就捉住我」並且「完場拖住手行出去」,Nikson話之後都有同阿恩出街,而且有錫錫,但當佢問對方「算唔算男女朋友」時,只係得到「要諗吓」的回覆。

Nikson同阿恩就係咁成為「你知道唔知道有人掛住你」近期的失敗個案。(網上圖片)

拖手又鍚埋都唔算係男女朋友?森美喺呢個時候都不禁表示「而家啲愛情好奇怪,鍚埋都未係男女朋友。」而觀乎阿恩的態度,森美就認為女方如果唔係「收兵」就係本身有男友,但Nikson就話「出街大家AA制,而且問過佢話無男朋友」既然係咁,唯有打電話問清楚。對於森美小傳問到「點解唔拍拖」、「考慮啲乜 」阿恩就話未有拖拍,原因係想睇定啲先,並以「相處模式」為考慮條件之一,雖然阿恩最終都講出「Nikson」呢個名,而Nikson亦即時公開表白,但阿恩就話「真係需要啲時間,因為太快」,森美為打圓場,都話「女仔刁僑扭擰係應該」並指雙方識咗唔夠一個月,確係需要多少少時間去互相了解。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。