【開心速遞‧有片】單身佛系男周嘉洛：緣份到自然會有拖拍
撰文：張嘉敏
出版：更新：
憑住無綫處境劇《愛·回家之開心速遞》飾演金城安一角而入晒屋的周嘉洛，為惜食慈善義賣湯水活動擔任店長，惹來大班市民粉絲圍觀同幫襯支持。有唔少市民趁嘉洛離開時都紛紛上前要求自拍合照，他亦來者不拒，表現非常親民。問到嘉洛可有遇過瘋狂粉絲，他說：「瘋狂就無遇過，好熱情嘅就有，不過佢哋應該係本身個人熱情，而唔係因爲見到我先表現得咁熱情，佢哋會捉實我影相，一手攬埋嚟，搭膊頭同攬腰咁，又或者同我面貼面，會聞到啲味道，例如汗味同頭油味。我會認住佢哋，下次見到我會縮後啲。」
嘉洛話可以學煲湯煲埋畀女朋友飲。（林迅景攝）
平日工作咁辛苦，嘉洛的媽咪當然有煲湯水給他啦。嘉洛表示：「我媽咪會針對我熱氣定寒涼嚟煲湯畀我飲。」問到他將來的女朋友要否識煲湯，他說：「唔使，我煲埋畀佢飲咪得囉，我依家唔識煲湯，咁可以學㗎嘛，煲湯係中國重要嘅飲食文化同烹調技術，我覺得好值得學。」單身的他又笑言自己是佛系男，對戀愛抱住順其自然的心態：「緣份到自然會有拖拍。」
周嘉洛遇過唔少熱情粉絲。（林迅景攝）