【專訪】竟然唔係《山狗》? 余允抗最滿意作品「好唔余允抗」

撰文:陳栢宇
出版:更新:

新浪潮導演余允抗喺電影生涯裡面執導過7套電影,包括《師爸》、《山狗》、《凶榜》、《馬後炮》、《飛虎奇兵》、《歌舞昇平》同《凶貓》,套套都有唔同特色,唔係獨沽一味恐怖變態片。我自己就鍾意《馬後炮》,因為有唔少笑位,王青、鄭則仕都做得好有喜感,但余允抗就對自己呢套作品唔多滿意:「製作係好好,但如果套戲係劉鎮偉拍就掂好多,因為我拍得唔夠癲、唔夠無厘頭。我拍到個形式,但拍唔到個韻味,睇幾多次都係咁覺得,我以為新藝城拍到,我都拍到,點知唔得。」

【專訪】《山狗》導演余允抗拍7套片就收山 原因其實好簡單?

【專訪】余允抗唔做導演照關心電影業發展:依家的確係青黃不接 

估唔到余允抗同我諗法真係爭咁遠,我諗我真係唔識睇戲。(陳順禎攝)

《歌舞昇砰》羅素楊雪儀有化學作用

咁余允抗最滿意自己邊套作品?答案令我好意外,佢咁答:「我好鍾意自己套《歌舞昇平》。」咩話?我覺得唔好睇喎,一來好唔「余允抗」,二來情節好唔合理,因乜解究楊雪儀明明好愛羅素,但係唔阻止羅素喺三樓跳落地,淨係自己喺廚房隔住個窗睇件事發生。余允抗自己就咁講:「我覺得佢哋係有個感情喺度,當時拍之前我叫羅素同楊雪儀溝通下先,畀咗間房仔佢哋入去睇《Love Story》,之後佢哋開工就好有化學作用喇。(我覺得梅艷芳戲份太少。)佢都好好骨幹,佢同黃霑嘅感情線好睇,一個藝人同一個經理人,關係好微妙,若即若離咁。」雖然佢咁講,但係我覺得呢套戲最正都係首歌 ── 《邁向新一天》。

+8