【吸煙有害】歐鎧淳曲線「公開」揀胡子彤原因：佢唔食煙！
撰文：賴家杰
出版：更新：
作為一名運動員當然唔應該有吸煙習慣，「世界無煙日2018」活動邀請歐鎧淳(Stephanie)擔任嘉賓亦非常正路，Stephanie成日要參加游水比賽，所以一定唔可以成為煙民：「自己本身唔食煙，尤其對運動員嚟講會更差，因為游水係一種心肺功能要求好強嘅運動，游水好需要肺活量，所以唔會諗（食煙）呢樣野。」男朋友胡子彤有冇呢個食煙呢？「佢唔食煙㗎，呢一個都係我揀男朋友嘅一個條件嚟。」
歐鎧淳今日出席「世界冇煙日活動」。（陳順禎攝）
活動期間，聽到Stephanie把聲有少少沙啞，原來係同佢生日有關：「因為我地有個『五月之星』生日會，所以尋晚一班朋友去咗唱K，都係遊水嘅朋友仔，一年一次好難得。」當中包括薛凱琪，點解呢？原來係男友專登安排：「佢叫咗Fiona嚟唱歌，自己都見過佢好多次，今次第一次同佢有互動，所以琴日好似發緊夢咁。」不過距離Stephanie嘅生日都仲有10日，5月30日先正日生日，佢都好期待男朋友會準備不一樣嘅驚喜畀佢。
歐鎧淳昨晚與一眾好友慶祝生日，薛凱琪更驚喜現身。（陳順禎攝）
又大一歲，雖然Stephanie覺得係一件開心事，但同樣更加唔想面對又大一歲嘅來臨，所以都選擇唔想刻意去諗呢個數字，隨著年紀越大咁會唔會開始屋企人有催婚？Stephanie坦言：「咁又冇，由細到大都冇，我爸爸媽媽比較開明，做全職運動員佢哋都知道，所以完全冇咁樣嘅狀態。」