《宮心計2深宮計》周秀娜變隱形人 TVB周刊介紹只得7個字

撰文:關穎賢
出版:更新:

無綫重頭劇《宮心計2深宮計》今晚首播,上星期劇中所有演員都有出席記者會宣傳,唯獨是主角之一飾演鄭貴妃嘅周秀娜完全唔見影,連佈景板同最新官方trailer都冇得出鏡,因為佢所屬嘅蕭定一經理人公司,最近同無綫有官司糾紛。雖然《宮心計2深宮計》總監嘅梅小青指娜姐嘅戲份冇被刪減:「一句對白都冇Cut!」,但所有宣傳,娜姐統統隱形,記者會佈景版,冇樣!宣傳海報原本影晒,執走!就連周日(5月20日)出版嘅新一期《TVB周刊》入面,就算摷到爛,都搵唔到娜姐個樣,大台「封殺」果然做足全套。

新一期TVB周刊都唔見娜姐嘅蹤影。

最新一期TVB周刊就係以《宮心計2深宮計》角色造型做封面,望落去,似唔似粵劇Show啲宣傳海報呢?

講番個封面,藝人方面就有胡定欣、劉心悠、馬浚偉、馬國明、蕭正楠、陳煒、黃心穎、米雪、謝雪心、羅霖、康華、張慧儀、張文慈、韓馬利、李龍基、呂珊、李美慧,但就係冇周秀娜。

再睇得仔細啲,成本《TVB周刊》有154頁,當中20頁係解構《深宮計》嘅內容同埋角色背景同埋藝人訪問,完全搵唔到娜姐,幾經辛苦,揭到去第102頁嘅足本劇情,終於搵到娜姐個名,得一行、7個字「鄭純熙:周秀娜飾」,連細圖都冇出現過娜姐個樣,慘!又難怪娜姐日前出席活動嘅時候,都講過覺得好可惜,同時又感到無奈,而家可以做嘅只能夠喺自己個人社交平台宣傳吓套劇咁囉……

揭咗N次終於見到娜姐個名。(《TVB周刊》)
+1
你可能感興趣