五大天生富貴樣演唔到窮人 冠軍坐擁億萬美金身家
做戲最重要是入型入格，正如三屆視帝黎耀祥演有錢人，點都唔夠佢演市井之徒吸引，亦有啲演員，你叫佢演窮人都唔似，就算揾奧斯卡級數化妝師幫手，著哂穿窿衫都好，嗰陣富貴味都好自然咁飄出嚟，嚴選５位天生有錢樣演員，第一位絕對是實至名歸。
三哥專演大sir
首先係三哥苗僑偉，天生小生樣，身型高大，雖然好少做有錢佬角色，但近年專演高級警察，《使徒行者》卓sir，或者近期熱播嘅《飛虎之潛行極戰》嘅聶sir，三哥未去到警務署長，但至少有房坐，試想像三哥著軍裝做散仔，點都覺得唔順眼，或者嗰種富貴氣喺當年做生意儲返嚟，當年他創立藝視眼鏡，傳聞賺了過億身家。題外話，三哥唔止富貴樣，亦發現年齡對佢嚟講真係數字，因為越老越型，大膽講句，成個TVB暫時冇人型過佢，如果有請提出。
御用飛虎王敏德
有飛虎就有王敏德，做親飛虎佢都係演阿頭，你叫佢做散仔一定唔似，可能係因為佢個樣鬼鬼地，就算佢唔演紀律部隊，演其他角色，必定係老闆級數，撈古惑一定係蔣生嗰個Level，金融業就一定係幕後黑手，你叫米高哥演年薪低過千萬，一定唔似，因為佢個樣真係好老闆feel。
游生專演高富帥
第三個係袁文杰，自從上年套《不懂撒嬌的女人》游生一角後，袁文杰差不多已改姓，大家見到佢只稱呼游生，成個形象係高大、金融才俊，英明嗰隻，你叫佢演送水輝一定唔似，就算企喺人堆都好似漆黑的螢火蟲一樣耀眼。
御用富豪黃子雄
講到御用有錢人一定數到黃子雄，特別《愛‧回家》的查家澤，絕對深入民心，他曾經接受《香港０１》訪問都表示編審唔會揾佢做草根角色，甚至同編審討論過，點知編審話佢就算幾努力演窮人都係唔似，天生唔似窮人，其實應該係好事嚟。
冠軍係馬雲佢相信無人質疑，身家百億美金起跳，偏偏有個小小的演員夢，上年就拍了套２２分鐘的短片《功守道》，戲中一個打贏李連杰、甄小丹、Tony jaa等，雖然未演過其他角色，但佢間中就會扮下MJ、Lady Gaga唱下歌，非常之有表演慾，突然想演戲，絕對唔奇，不過就算演都唔會係演窮人，點解？唔駛講啦。