胡琳遠赴冰島為MV取景 挑戰高難度拍攝

撰文:
最後更新日期:

出名靚聲嘅胡琳(Bianca)剛推出新專輯入面第二首主打歌《青玉案》嘅MV,新歌引用宋代詩人辛棄疾嘅千古絕詩為創作元素,將細膩詩句融入歌詞中,營造凄美意境,在歌聲裡添上詩情畫意。今次嘅MV喺冰島取景,無論拍攝手法定係構圖,都媲美名師筆下嘅山水畫。Bianca喺MV尾段只穿上單薄藍色裙遊走冰川,挑戰高難度攝製手法:「嗰段片拍攝時要請專業登山導遊協助,做足安全措施,所以我嘅上身係裙,下身就著咗對完全唔襯嘅釘鞋!當時全體工作人員徒步行咗個幾鐘先到取景位置,大家都拎住好多器材,過程超辛苦,拍出嚟之後睇到嘅畫面真係好震撼,同埋非常值得。」

其中一段Bianca以紅裙登場嘅凄美畫面取景於黑沙灘,其實係電影《神奇女俠》女主角Gal Gadot拍攝手機廣告嘅地點相同,拍攝出嚟嘅效果,都令大家好自豪。為咗營造意境,Bianca嘅團隊帶咗一份用毛筆寫上嘅歌詞迎風攝錄,但因為風速過大,紙張突然飛脫,Bianca笑言:「大家不顧儀態咁追,導演仲追到四腳朝天,我忍唔住一邊衝上前協助,一邊喪笑!」

Bianca近年在音樂製作上參與度越來越高,除投入演繹外,亦致力作曲填詞,謂:「新碟入面有五首歌都由我作曲、兩首填詞,其實填詞好考個人學識同功力,為咗令作品豐富啲,我都有逼自己去背唐詩三百首,希望之後可以將名詩融入自己作品入面。」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。