【衛蘭專訪．有片】最紅時瘋狂購物減壓：而家最想買樓畀爸爸
新歌以《生涯規劃》為名，但衛蘭說她的人生其實沒有怎麼規劃過，直到近年身體頻頻出現問題，令她由懷疑自己的存在價值、有過了結生命的念頭、到走出陰霾後才醒覺人生確實需要一些規劃：在公，衛蘭望以歌曲療癒大眾心靈，在私，她笑言是戒買名牌、存錢買樓送畀爸爸。
衛蘭說小時候總被熱情牽引着，因為只是單純的喜歡唱歌，所以到過不同的酒吧、活動演出，成為歌手絕非預計之內的事。出道後火速走紅，唱片銷量超過40萬張再唱入紅館，忙得根本沒時間去規劃，購物成了最大的減壓方法。「以前好喜歡買名牌，幾萬蚊一個袋……我咩色都要齊晒，花很多錢在物質上，但依家真係唔會，亦好少會無原因咁買貴嘢，最想存款在菲律賓買樓畀爸爸。」之所以有此改變，並非如傳聞所指收入大不如前，而是聲帶、脊髓接連出現問題，令她感到十分洩氣。「因為脊椎側彎令我要從新學行路、站立、坐的姿勢，係好depress，加埋把聲又出問題……有一排諗到好衰、好陰沉要end my life。」
我的價值是什麼？
總是笑面迎人、充滿正能量的衛蘭，誰又會想到她也曾動過最壞的念頭？「當然有同妹妹、朋友講，因為當下係需要馬上搵人傾，如果唔係會好易諗錯，當然都問咗自己好多問題『我把聲係未等如我嘅價值？』亦都同自己講唔可以懶，要去做treatment、去面對呢個問題，Do the best you can。」珍惜生命過後，衛蘭終於得到了人生首個「叱咤樂壇女歌手金獎」，這個等了12年的榮譽，她以「感恩，所有好事都係神賜給我」總括了這一切。
我叻我可以肥
問到如今是否可以高聲唱出陳詠謙的《脂肪葡萄》中的「我叻我可以肥」，她隨時哈哈大笑，並說「叻唔叻都可以肥 」對於體重，衛蘭坦言聽太多，所以已經盲見到化晒的地步，一句「I look normal 所以唔需要去計較人哋點諗」可感受到當下的她是真的充滿了自信，就有如《生涯規劃》中所提到「不要為誰放棄了 你的荒誕」，衛蘭說曾經也因身形而失去信心、收埋自己，直到近年開始學會欣賞、接受。「有信心時就覺得自己係靚，我唔係最瘦，但由心而發咁笑係最真實。」
心理學家：衛蘭好識處理情緒
其實這天與衛蘭一起訪問的，還有說書人成立人、臨床心理學家Amanda Li(李昭明)，二人的認識是因為《生涯規劃》MV找來了有不同經歷的人拍攝，而衛蘭亦想透過作品表達對社會的關注，雖然認識時間不長，但已十分投契。「好impress衛蘭知道點同自己相處，呢個係好重要，因為當你唔了解自己時，你唔會知道點去照顧自己，但更印象深刻係無論高或低，她都很ok，因為人唔會長時間開心，但當你唔開心時，點容讓自己唔開心呢？衛蘭在這方面做得好好。」Amanda說香港人工作忙碌，很多時情緒出現問題都不一定會留意甚至會逃避，但衛蘭察覺自己有問題後，隔即找朋友、家人幫忙，是非常正確的做法。「知道自己經歷係好重要，就算有自殺的想法，要明白呢刻係好辛苦，亦都會對其他人有呢個念頭時更能理解，這也是一種healing。」
髮型：HayssesIp@HAiR
化妝：江中平化妝室
服飾：EVISU