容祖兒成功取簽證赴美參加阿嬌婚禮 繼續蝦碌忘記帶身分證
撰文：冼燕珊
出版：更新：
鍾欣潼（阿嬌）同台灣醫生男友賴弘國（Michael）大婚在即，好姊妹容祖兒（Joey）日前被爆因美國簽證過期而要缺席阿嬌婚禮，被大家取笑蝦碌無極限。當大家都以為Joey 今次真係要錯過阿嬌婚禮，替佢哋感到可惜之際，Joey 今日下午就喺 IG 貼出同Twins仲有鄭希怡（Yumiko）嘅合照報喜，話佢經歷重重難關，終於都成功飛到去美國參加阿嬌婚禮，真係峰迴路轉！
Joey 成功參加阿嬌婚禮，真係有驚無險。（IG圖片）
Joey 於IG 貼出四人嘅淡妝照，寫道：「傻人有傻福，經歷了最驚險的四天，機票改了又改，尋晚出境又唔記得帶身分證，在飛機又成晚瞓唔着，到步（埗）後仲唔見左（咗）頂帽，頭大容量細的悲歌，總之過程唔重要最緊要結果，我終於在最後一刻拿到簽證，可以給我最親愛的嬌一個驚喜，開心感動刺激兼而有之，我嘅人生好像過山車一樣，祝明天一切順利。#龍虎豹蛇」
Joey 繼續蝦碌，又唔記得帶身分證去機場。（IG圖片）
睇嚟Joey 即使成功拎到簽證，但依然不改蝦碌性格，繼續唔記得帶身份證又唔見隨身物品，不過今次有驚無險可以參加到由細識到大嘅BFF 阿嬌嘅婚禮，呢啲「意外」卻顯得很微小，，感覺真係好圓滿。
「英皇龍虎豹蛇」齊集，見證阿嬌大婚，咁先係圓滿。