【肥肚唔肥人】模媽生B前齊開派對　Jessica C孖Ana R.鬥巨肚

2018年大批星B排住隊出世，名模界就更加誇張，Jessica C.呢日舉行Baby Shower，邀請埋同樣大緊肚嘅Ana R. 同Rosemary出席，三個靚媽都係肥肚唔肥人，企埋一齊挺住巨肚合照，場面相當溫馨。

已經懷孕9個月嘅JC其實已經隨時生得，不過佢依舊無時停，影完靚靚孕照後，呢日同老公安志杰帶埋囡囡Tessa，為腹中囝囝舉行Baby Shower。場地佈置用上大量粉藍色，大大個BOY字汽球話俾大家知，肚入面係囝囝嚟架﹗呢日嘅派對仲要唔止得Jessica一個大肚婆，佢嘅好姐妹Ana R.以及Rosemary一樣大住肚到場，可以同姐妹同年做媽媽，難怪佢地都玩得特別開心興奮啦。Jessica以及Ana R.兩位準第二任媽咪不約而同話暫時未為第二胎計劃用什麼名字，好大機會生左之後先決定。