嚴崇天苦練韓文突圍 成御用韓星見面會主持人

撰文:洪曉璇
出版:更新:
唔少韓星來港活動中,都會見到嚴崇天擔任司儀。

近年幾乎每個月都有韓星到港,粉絲忙住追星之餘,可能都會留意到,唔少韓星Fans Meeting或記者會,都會見到同一班工作人員,奇妙電視主播嚴崇天就係其中一位。大學時期已經修讀韓文嘅阿天,單係今年已經做咗6次韓星活動主持,深受主辦單位及韓星粉絲讚賞,儼如韓星御用主持一樣﹗阿天表示:「好多韓星私下都好nice架﹗」

嚴崇天與少女時代泰妍。
GOT7嘅Jackson曾經喺活動上威逼利誘嚴崇天跳舞,跳完仲笑佢流好多汗。

依家識多一種語言真係工作機會都多過人,好似阿天就真係「贏在起跑線」,早喺大學時期韓風未咁盛行時已經修讀韓文:「當時因為學日文嘅人太多水平又好高,所以自己揀韓文,比較易突圍而出。離開校園後斷斷續續有繼續進修,前年及去年更連續兩年向公司請假,飛到韓國嘅大學上堂,亦因此增加唔少同韓星有關嘅工作。」

陸星材見面會上嚴崇天除咗做MC,仲要借出手機俾粉絲影合照。

單係計今年阿天已經主持過6次韓星活動,為泫雅Fans Meeting擔任司儀令佢最為難忘:「出場前泫雅問我叫咩名,本身話叫我司儀就可以,泫雅就好堅持話唔得要我講韓文名俾佢知,出場時泫雅居然專登講一段介紹我,令我受寵若驚。去到教粉絲跳舞嘅環節,唔知點解台下歌迷起哄要我跳,造就呢個同泫雅共舞嘅難忘回憶。」

嚴崇天大讚泫雅相當NICE。

由於佢本身識講流利韓文可以直接同韓星溝通,相對要透過翻譯對答,明顯感受到氣氛更為流暢,唔少粉絲SHOW後更會專登到社交網站留言讚呢個MC做得好﹗「我記得主持陸星材見面會時,有粉絲太緊張唔記得拎手機,點知完場大家散晒差啲俾唔返D相佢地。其實除咗主辦單位同韓星,粉絲都係好重要嘅一部分,得到佢地讚賞我都相當開心。」阿天依家更成為韓國觀光公社嘅韓遊團長,幫佢地宣傳韓國文化,年尾會再到韓國進修韓文同埋學整韓國菜,全方位進修韓國文化。

嚴崇天依家更成為韓國觀光公社嘅韓遊團長。
+2
你可能感興趣