【深宮計】唐朝酷刑盛行　武則天改良「骨醉」變態過凌遲處死

講到中國古代酷刑，可能大家都會諗起五馬分屍、凌遲處死、腰斬、宮刑等，但係其實呢啲都係小兒科，仲有好多酷刑係恐怖到你估唔到。《宮心計2深宮計》第5集講到太子妃(胡定欣飾)掌管後宮之後，就決定重建回心院，但回心院就有個傳聞就係每逢月圓，死咗嘅蕭淑妃就會番嚟怨魂索命。事緣當年蕭淑妃被武則天囚禁，先帝經過被囚禁嘅地方時，聽到蕭淑妃哀嚎而產生憐憫，將該地名為回心院。武則天知道之後大發雷霆，下令將蕭淑妃用鐵鏈鎖住日夜毒打，再將佢嘅手腳斬斷，做成「人彘」。咁究竟咩係「人彘」呢？

其實「人彘」(讀音：痔)呢個酷刑就係將人變成豬嘅酷刑，最早喺西漢嘅時候就已經出現，發明「人彘」嘅就係呂后。話說劉邦奪得天下之後，就戀上戚夫人嘅美貌，喺妒忌心作祟之下，就對戚夫人報復。先將戚夫人嘅頭髮剃光，斬晒啲手手腳腳，挖去雙眼，用煙燻耳、服啞藥，令戚夫人講唔到嘢，發出嘅聲音就好似豬叫，然後掉佢落屎坑……去到武則天統治年代，就將「人彘」演變成「骨醉」。行刑方法同「人彘」差不多，武則天將蕭淑妃做成「人彘」之後，再將蕭淑妃放落一個裝滿酒嘅大缸入面，並將酷刑名為「骨醉」。

唐朝係使用酷刑嘅朝代，原因係武則天在位期間要排除異己，所以就發明不同酷刑，並將酷刑「發揚光大」，仲召集一班人做「酷吏」去研究同施刑，由生性殘暴嘅來俊臣做代表。「酷吏」發明嘅酷刑嘅名全部都好好聽，例如「仙人獻果」，就係將犯人赤裸身體跪喺碎瓦礫，雙手捧枷舉過頭頂，仲有「玉女登梯」，迫犯人爬上高梯，用繩綁住頸並向後拉，令犯人跌死或者窒息而死，但呢啲全部都唔夠「骨醉」變態。所以話呢，無毒不丈夫，最毒婦人心，歷史都提醒大家千萬唔好得罪女人，尤其係有權勢嘅女人，如果唔係，你會死得好慘……