【飛虎之潛行極戰】O記濫用火力支援？ 前警司講飛虎幾時會幫手
《飛虎之潛行極戰》中黃宗澤、張兆輝和王敏奕等一班飛虎隊員為了長期保持Fit爆體能日操夜操，不過就算有強健的體魄，都要有充足的裝備和火力才能100%完成任務。曾任機場特警隊主管及創立反恐特勤隊的警隊前警司黎家智，今次便為《香港01》讀者解構飛虎隊的主要裝備。相信好多人都會覺得飛虎隊戴的面罩又焗又熱，不太明白實際有何功用，似乎得個型字，但黎Sir就話飛虎隊面罩Look不止是造型：「戴頭套除咗可以隱藏身分，一班人戴住頭套亦製造到好勁嘅壓迫感，同埋個頭套係用抗火材料做，有火舌彈落塊面都唔會受傷。」
提到劇中O記經常Call飛虎隊支援，密過叫外賣，問其實叫飛虎隊幫手是否任Call唔嬲？黎Sir就話：「其實飛虎隊功用好大，無論係火力、戰術支援都可以，所以唔一定係反恐嘅情況下先用到，任何行動只要覺得有需要飛虎隊幫手，都可以透過行動科申請。（捉古惑仔都Call得飛虎？）呢個情況出飛虎隊真係極度少。」講起飛虎隊主要是使用HK MP5衝鋒槍，黎Sir就指香港是在70年代時，跟從英國軍方使用此款槍械：「MP5勝在方便、細支，喺唔同環境都好啱用，唔會好似比較大型嘅槍械咁，喺狹窄嘅環境度使用得冇咁靈活。」
【飛虎之潛行極戰】特訓點止跑操場 前警司爆地獄週：9成練體能
網上經常出現一些排名表，將世界各地的特種部隊分高下，美國海軍海豹突擊隊、英國特種空勤團多數都佔頭排位置，而香港的飛虎隊永遠十強不入，問黎Sir到底這些排名是否真確存在？黎Sir則懇請大家睇完笑兩聲便算：「其實都係得運動、競技比賽先會有排名，特種部隊之間係冇功能、戰術上嘅比賽，所以可以話冇排名呢樣嘢。」
講到飛虎隊認真搵命搏，執行任務時危險，接受訓練時辛苦，那麼飛虎隊隊員的薪酬會否比起普通警員更高？黎Sir就話其實飛虎隊的人工都是依照警務人員薪級表而定：「基本上人工係一樣嘅，不過唔同工種就有唔同嘅津貼，至於邊啲工種至有津貼，就唔方便透露。」而其實網上亦不乏飛虎隊人工的小道消息，有網友就指飛虎隊隊員會較同級警員人工高2點，月薪可以相差$1000至$3000或者更多，亦有網友指飛虎隊的津貼約$3000，不過孰真孰假就不得而知了。