【冒險王衛斯理】林家棟文凱玲對敵到真愛 反派CP原來最有情有義

撰文:
最後更新日期:

文凱玲拍住林家棟做苦命鴛鴦,演技即時升級。

無綫播出嘅《冒險王衛斯理之支離人》劇情進入白熱化,一心想進入古墓的白老大(任達華)已經完全唔理會自己係國際刑警嘅身份,除利用個仔去擋子彈外,又搞到個女白素昏迷,在古墓大戰外星人更係荒謬到笑唔出⋯⋯

苦命鴛鴦再次相遇,但下場係兩個只能活一個。

劇中衛斯理同白素雖然經常出生入死,兼訂埋婚,但觀眾似乎較為buy鄧石(林家棟)同羅剎(文凱玲)呢對苦命鴛鴦。身為黑天使嘅羅剎專做黑市生意,為了入古墓尋寶/搵到永生之謎,於是向鄧石埋手,本為敵對關係嘅兩位,卻一次又一次互救,而當羅剎發現鄧石控制唔到自己身體時,更表現得甚為同情,並順理成章上埋床,而鄧石亦終於提及自己點解會變為支離人。羅剎受傷時,鄧石就話過:「我份人好均真,邊個對我有恩、邊個救過我,我都會記住。」羅剎雖然口口聲聲指諗多咗,並說一切都係為得到入古墓嘅辦法,但眼神卻充滿對鄧石嘅愛。「其實你有好多機會,點解唔落手?你都幾厲害可以令我唔丟下你。」

羅剎同鄧石一開始係敵對關係,但最後變成不離不棄。

呢對壞壞CP雖然多數都係逃亡同追逐,但比起衛斯理同白素卻來得自然,當然林家棟嘅演技亦為鄧石一角狂加分,要愛有愛,要壞有壞,而余文樂就全程都係得一個chok樣,講到有幾愛白素,但卻經常令對方陷了危險當中⋯⋯劇集講到鄧石個頭被白大老扣留,羅剎冒死相救兼阻止白老大進入古墓,苦命鴛鴦再次相遇時,鄧石以自己無能力保護對方為由,勸羅剎快啲走,結果得到羅剎一句「唔驚,仲有我!」鄧石以笑著表示「值得,但唔好陪我做苦命鴛鴦。」令羅剎更加不願離去,結果遭白老大鎗殺,親眼目睹另一半死喺自己面前,卻無力阻止,悲痛不已嘅鄧石成功甩身後,在古墓同白大老交手時,竟選擇犧牲自己,與外星人一同被分解,一個曾係十惡不赦嘅鄧石,有如此捨生取義嘅舉動,或許是為了在另一時空與羅剎再聚。

兩個仲有唔少親熱戲份。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。