【早霸王】空姐空少好多花邊故事 靚仔夜晚有女敲酒店房門？
撰文：鄺鈺瑩
出版：更新：
森美放完假返黎主持《早霸王》，結果遇上悶棍聽眾。（網上圖片）
又到《早霸王》的「你知道唔知道有人掛住你」環節，之不過，今集真係好悶好悶同好悶，連森美都連番抗議，說話今日打上電台嘅女主角阿佩，主要係想多謝老公由拍拖、生小朋友都對佢呵護備至，不過當問二人的愛情故事時，阿佩就唔係好講得出，只係話當年在外國讀書時，老公一有時間就飛去探佢，又試過聖誕節時，一齊去德國，佢口中嘅 「好sweet」，相信只有佢先感受到。
森美話空姐唔只會向機師埋手，更笑言高質空少成晚都會有人敲門，好似撞鬼咁。（網上圖片）
而唯一令森美聲線提高嘅，就係聽到阿佩話老公係「空少」！長久以來，空姐同空少的生活一直都被視為「多姿多彩」，而森美更話曾經聽聞高質空少一落機返到酒店之後，空姐都會鬥快去敲門，咁到底阿佩老公又有無試過被敲門呢？「總有花邊故事，但唔係敲門。」之後阿佩更表示：「有可能唔係淨係空姐呢，空少都有敲空少門。」敲門做乜呢？怕且畫公仔都唔使畫出腸吧。反正，阿佩同老公已經組織了一個幸福小家庭。至於呢名空少求婚，就並非在萬尺高空之上，而係南丫島，call齊親朋好友，set埋投射螢幕……講到呢道，森美又再忍唔住呻悶，更叫阿佩將來唔好教小朋友作文，因為一定好低分。