吳彥祖遇無妄之災　三藩市街頭被砸車偷竊：早多5秒返就捉到佢

防人之心不可無，廣告都有話，出門時要鎖好門窗提防小手，不過有時光天化日之下罪案一樣會發生，呢次受害嘅就係吳彥祖。最近Daniel人在美國三藩市拍攝美劇《荒原》（Into the Badlands），點知呢日喺街頭遇上小偷，打爛佢嘅車窗直接偷走車內物件，令佢相當憤怒。

Daniel呢日上載兩段短片到IG，片中見到佢嘅黑色座駕泊喺路邊，有一架綠色私家車駛至，小偷落車左顧右盼後，打爛Daniel車窗取走車內兩個袋然後離開。Daniel留言話：「我將車泊喺街頭，就係片段最左邊紅色車前面嗰架黑色私家車。可以見到有個男人企喺我嘅車尾，幾秒後打爛車尾車窗，從車內取出兩個袋。其實右邊就係我同我朋友（片中黑衫及黃衫）行緊返去攞車，如果早多5秒返到，我一定會抓到佢。」Daniel仲呼籲大家，如果喺三藩市見到呢架綠色車，記得影張相通知佢。