陳展鵬出示WhatsApp反擊 否認欠租:我幾唔識都知要履行租客責任

撰文:
最後更新日期:

今日有報道指陳展鵬欠租兼毀約,將單位租給展鵬的業主指控展鵬多宗罪,包括展鵬主動要求簽約兩年卻提前一年搬走,即等同毀約須賠償一年租金,又指展鵬並未繳付最後一個月的租金而用按金代替,還有弄壞單位內的電器同地板等。該業主還拍片去數臭展鵬。今日展鵬出席TVB新劇《天命》活動時,當然會被問及欠租毀約一事是否屬實,展鵬亦逐一回應有關指控。

陳展鵬出示cap圖反擊業主指控。(Tungstar)

問到是否他自己提出要簽租約兩年,展鵬說:「咁當然發生呢件事係因為有問題存在,我自己覺得好無奈。其實租約嘅事2、3個月前已經咗settle咗,由於我工作好忙,我媽咪身體又唔好,所以我交畀助手處理。佢 (業主) 事後可以變嘅,無問題,可以循法律途徑去處理。係咪因爲我係藝人佢先咁做 (透過傳媒去指控)?我自己做幕前,就算幾唔識都知要履行租客嘅責任。我哋一直有傾有whatsapp有cap圖,亦都影晒相,我以為件事已經解決咗。」

兩位當事人嘅口供好大出入。(吳子生攝)

展鵬否認簽了兩年死約:「份租約係話一年內搬走可以提前一個月通知,畀返一個月租金就可以,唔係話咩欠咗成年租。個單位係媽咪同鄰居去睇去租嘅,當時我喺內地拍緊劇。我之前租過兩個單位都同業主關係好好,維景灣畔住咗成7、8年,點解我租呢度就咁快要搬?上屋搬下屋,唔見一籮穀,唔通我貪得意咩?份租約係我要求簽嘅,始終白紙黑字好啲,但原來有啲嘢好模糊。當日係個業主叫我媽咪租,最初我媽咪話唔租,佢之後又再問,好有誠意咁,仲話兩個櫃唔啱可以拆咗去,話只要唔改個則就得㗎喇,佢係咁講嘅。」

即click圖輯睇陳展鵬出示whatspp反擊

+2

可能驚太激動,所以要補補妝先。(吳子生攝)

陳展鵬私自斷「死約」兼唔交租 業主嬲到爆直斥他是無賴

展鵬租住該單位後原來有好多手尾要跟:「兩個櫃拆咗之後啲牆紙污糟邋遢,係我畀錢搵人油返好,啲電係咁跳制燒fuse,都係我畀錢整,全部都有單有據。我有同業主講,佢話佢可以搵人整不過覺得我應該搞得掂,咁我咪自己搵師傅整。我屋企最緊要係個煤氣爐,因為我媽咪冬天洗碗洗手用凍水對手會好凍,間屋個煤氣罐壞嘅,同咗業主講佢就由我4月入伙拖到上年年尾先話整,最後係我自己搵煤氣公司搞,我畀錢嘅。」

展鵬而家租住嘅係維景灣畔。(網上圖片)

對於被指將口釘釘入冷氣機內,展鵬說:「我點會咁做?有做過我雙手斷!部冷氣機本身已經唔掂。發生咁多呢啲事仲點再傾落去?我哋都想好嚟好,有問過業主佢話你喜歡啦,所以我先會將按金當租金,佢亦都無反對,我以為件事已經完咗。」展鵬又否認整到地板發霉:「嗰啲地板嘅相同片係我發畀佢㗎,可能因為潮濕啲地板拱起晒,啲邊位又白又灰,我媽kick到入咗醫院,好嚴重,依家都仲未好返。我覺得其實好少事,自己亦未做到最好,但係咪因爲我係藝人就用咁嘅方法去處理?」他表示現已交由律師去處理。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。