【非分熟女】新戲變身宅男媾蔡卓妍 林德信:「現實我都係咁!」

撰文:
最後更新日期:

今日(13號)係Sa同吳慷仁擔正嘅電影《非分熟女》正式開鏡,有份參與演出嘅林德信(Alex)亦都有份出席,今次佢要飾演一位性格害羞內斂嘅電腦工程師,到底難唔難到佢?Alex就咁答:「我覺得並唔係難在角色,因為主要都係講個男仔用啲老土方法去追Sa,其實我現實生活都一樣好被動,所以呢個角色對我嚟講唔算難。」

但原來今次拍戲難度唔喺戲內,反而喺戲外,Alex就話:「因為今次導演兼任埋編劇,好多嘢都有晒定稿,有時我覺得可以改進嘅地方,導演未必會認同我,所以個難度在於點樣俾到個大家都滿意嘅效果出嚟,好在導演脾氣都好好,唔會因為意見不和嘈交。」

Alex笑言自己現實都係宅男角色,感情上比較被動。(陳順禎攝)

佢咁講,係咪暗示自己脾氣差,好易同人嘈交呢?Alex好坦誠咁話:「我最近都留意到自己開始有少少脾氣,可能因為我至今都拍過幾部電影,對於揣摩角色有番少少經驗,自然好希望可以分享下自己嘅諗法,但若果有人未試過就Ban,點都會有少少唔甘心。」

但無論Alex自爆幾多缺點,作為一位男神又點可能一直單身呢,一講起感情生活,Alex即刻露出甜美笑容:「我諗有啲嘢......都係唔講會好啲。」咁到底係咪表示自己有拖拍?Alex面對追問只係聳聳肩講咗句:「Maybe.」輕輕帶過,事實係點就惟有等大家自行判斷啦。

Alex坦然承認自己脾氣差咗,希望想法得到導演認同。(陳順禎攝)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。