LuLu董嘉儀燈神之名水洗都唔清 今晚佢又撐邊隊？
撰文：翁漢瓏
出版：更新：
「大埔Lulu」董嘉儀早喺四年前已有「燈神」之名，今年世界盃開鑼大家都好期待佢嘅「法力」有無退步。Lulu早前力撐德國，點知德國輸一球完場；之後又話睇好巴西，點知巴西又比瑞士逼和，相信佢燈神呢個名真係水洗都唔清啦，唔知佢自己又點睇呢？
LuLu堅決否認自己係「燈神」，直言自己只係一個普通球迷。（梁碧玲攝）
面對網民嘅攻擊，Lulu就笑住回應話：「冇唔開心，當係一個笑話咁睇，其實我自己都唔明白，明明有做功課，好正路咁去推測，但結果次次都唔係預期之內。」至於有網民叫佢唔好再着德國波衫，LuLu就話:「我唔覺得有咩問題，我都只係好似一個普通嘅球迷咁，會去着自己鍾意嗰隊嘅波衫。」
LuLu今晚睇好哥倫比亞，唔知最後會唔會又俾佢燈中呢？（梁碧玲攝）
除咗德國之外，到底Lulu仲睇好邊隊？佢就話：「我都幾鍾意冰島，因為我覺得佢哋好團結，好欣賞佢哋。而今晚日本對哥倫比亞，我自己就覺得日本嘅球員平均年紀比較大，我就會睇好哥倫比亞多啲。而俄羅斯對埃及果場，正路黎講俄羅斯應該要贏，但我自己比較偏好埃及。」
LuLu話自己呢排不停食嘢，搞到身型都肥左唔少。（梁碧玲攝）
不過晩晚都要捱夜睇波， LuLu為咗提神，果斷放棄keep fit，決定食到開波：「好彩暫時黎講啲賽事都好精彩，一啲都唔會悶，不過為咗頂住眼訓，我夜晚都係咁食嘢，呢排感覺都肥咗，但為咗世界盃冇辦法啦。」