【深宮計】周秀娜拍劇有目的 最憎被睇死:覺得我做唔到更要試

撰文:
最後更新日期:

《宮心計2深宮計》劇情進入白熱化,為爭寵、為保地位各出其謀,周秀娜對於這種宮廷鬥爭相信並不會感到太陌生,畢竟她也曾是「𡃁模」熱潮的核心人物,眾人為見報講嘢句句有骨,過程好比古惑仔爭地盤。「明爭暗鬥一定有,我覺得係立場問題,但好多時我都會選擇置身事外。」

每次被捲入是非時,周秀娜的回應都大方得體,EQ真係咁高?「我其實好易忟,但多數都係工作上,會忟自己點解唔做得好。」(梁碧玲攝)

09年大量𡃁模突然湧入娛樂圈,周秀娜與Angelababy、陳靜、楊梓瑤等人鬥過你死我活,寫真尺度要幾踩界有幾踩界,正所謂同行如敵國,更何況大家都係靠身材搵食,明嘲暗諷情況時有發生。回望過去勾心鬥角的日子,平時滔滔不絕的周秀娜,忽然沉默了一陣子,氣氛亦變得凝重。「《深宮計》去到某個位係迫於無奈,而我角色係你唔害我的話,我唔會去結怨,同埋我係嗰種你點對我,我點對返你嘅人,係咪好似娛樂圈?我覺得成個社會都係,每個人為了想要的位置、結果而有不同的選擇,我同定欣是好是壞也很難去區分,明爭暗鬥一定有,但好多時我都會置身事外。」周秀娜說自己屬於小說話多做事的人,而且也討厭解釋,更何況當事情不單只有周秀娜一人時,她更怕去觸及。但人在江湖,總有身不由己時。「如果你係重要的話,就算唔想,要生存的話可能都無可避免捲旋渦之中,嗯……至少都係(代表)重要,有愛有恨才會被捲入,哈哈!」

當年𡃁模過你死我活,撇除外人Angelababy、陳靜等人,單係周秀娜同公司的𡃁模就已經有一打。(視覺中國)

講得多先唔開心

周秀娜所指的旋渦,大概也包括《深宮計》所有宣傳被隱形吧?首次拍攝大台的古裝劇,背不完的對白、重得要死的頭飾,明明是劇中的核心,卻因為經理人公司與大台的官司問題,而在所有宣傳活動、影片中消失。「其實開頭無唔開心,係你哋(傳媒)講得多之後先去諗,唔開心係因為有好多崗位,例如導演、燈光師,現在感覺是他們沒有為我的戲份付出過,戥工作人員覺得可惜,同埋之前有啲材料拍咗,現在不能播出,有點對唔住佢哋。」在周秀娜的角度來說,宣傳是希望令觀眾更為關注,但每當想到為了宣傳而將同一番說話不停地重覆,也確實有點怕。
 

首次拍劇,緊要在所難免,周秀娜記得入劇組前一日要拍廣告,但腦中全是《深》的對白。「開頭因為要顧及其他嘢,所以無乜感覺,係後來愈來愈適應。」(網上圖片)

想得到更多觀眾

對於古裝劇,尤其宮鬥類型,周秀娜雖然一直恨拍,但一直無機會,原因係外型太時裝被嫌棄。難得監製梅小青看過電影《29+1》後,認為她十分適合鄭純熙一角,所以點都要拍。「我想更多觀眾睇到自己的演出,因為除非你真係好鍾意部戲或者演員,先會買飛入場,劇集感覺上接觸的人群、觀眾層面更多,確實係我想要嘅。試完我點都話比你聽會再拍㗎啦,辛苦係值得,因為感受過,以前想像唔到,亦唔肯定自己做唔做到,拍完發覺原來自己做到,感覺學到好多新嘢。」

鄭純熙會吾是《深宮計》的贏家之一?周秀娜笑言自己個個都係羸家,又指自己雖然由18集去到尾,但「定欣多我兩集喎。」((梁碧玲攝)

名氣嚇怕追求者

周秀娜口中的新嘢除了是十分清晰地講出又長又譖的對白外,舉手投足也要十分淡定。「橫店拍攝時落雨,件拖尾古裝吸晒水,我好似拖住個沙包做加重訓練咁,但又要表現得好輕鬆咁,其實都訓練到自己的意志,同埋好喜歡好定、專心拍攝的感覺。」劇中周秀娜為了心儀已久的馬浚偉而計劃入宮,並成為鄭貴妃,現實中,她也是個為達到目的不惜一切的人。「為咗食我都幾執著,旅行前我會做晒資料搜集,一日七餐係基本。」其實除了食之外,周秀娜也曾為了北極光而去到挪威,當時導旅曾表示天氣不佳提議她不要出團。「我都係照去,結果睇到,本身性格係咁,唔想錯過任何一樣嘢、唔想後悔,希望嗰樣嘢係最好咁完成,或留下最好的moment。」不過這種執著,似乎沒有套用在愛情之上,有名有利卻少了一個伴,可曾想過是因為名氣或身家令追求者卻步?「可能係……但係無辦法,我生活就係咁。所以點解會搵一個同自己差不多嘅人,依家唔諗,因為真係無得諗,你哋成日問我幾時搵到,幫我解決咗呢個問題先啦。」

 


hair: Angus Leung@hip hair culture(Cwb)
make up: Circle Cheung@ndnco.co
wardrobe:Three Floor
venue:馬哥孛羅香港酒店
 

+3
+2


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。