【深宮計.專訪】黃心穎見慣娛圈明爭暗鬥:有咩事我都會出聲

撰文:陳栢宇
出版:更新:

黃心穎(Jacqueline)在《宮心計2深宮計》昨日(26日)一集中守得雲開見月明,她朝思暮想的任三恕(馬國明飾)終於她表明心跡,令不少觀眾睇得好感動,而一直以來外界都覺得她很早已視男友馬國明為偶像,兩人能夠現在能夠走在一起,與劇情巧合地雷同。不過,心穎BB就指自己其實從來不覺得對方是偶像,她在接受《香港01》專訪時答謂:「當然係欣賞佢嘅,但唔係追星咁鍾意,只係入咗行之後,發現佢性格都好,了解後更加Respect呢個人。」

黃心穎接受《香港01》訪問時指自己從來沒有當過男友男國明是偶像。(陳順禎攝)
+4

那麼自己會否覺得《深宮計》劇情同自己經歷好似?心穎BB笑謂:「少少相同啦,冇劇入面咁誇張,甘若芊係好傾慕呢個將軍,覺得佢係男神咁,但我現實生活裡面冇咩人令我咁仰慕,唔會令我好似花痴咁。」即是對住馬國明都不會變花痴?心穎繼續笑謂:「冇喎!圈中靚仔好多,當身邊同事個個都係咁靚仔靚女時,你就冇乜感覺架喇開始。(馬明靚唔靚仔?)靚仔好易搵,靚仔得嚟有內涵有修養有其他嘅嘢係更加難。」

不過,心穎BB都覺得《深宮計》的劇情和現實生活中有些少相似。(陳順禎攝)

我們眼中的馬國明,好可能只是得「天然呆」或者「好悶」的一面,馬國明的內在美,應該只有心穎BB最清楚。心穎BB大讚男友:「我覺得佢比一般人,唔知呢,對我嚟講係佢係最真誠嘅人。喺咁快嘅事業或者生活當中,佢係一樣好慢嘅嘢、好靜嘅嘢。(好有避風港嘅感覺?)可以咁講,對住佢所有嘢都可以慢落嚟。」

當然最和善的人都會有固執的一面,但心穎BB就指自己最終都會說服到對方:「其實佢都有好主見,可能佢年紀大啲,佢會耐心聽我完先至反駁我,唔係一嚟就同我鬥咀。(會硬碰硬?)雖然少但係有。(最硬係點?)佢都唔係好硬,硬嗰時都係咁上下!」自認又急又好勝的她又指起初都會因為馬國明性格「太淋」而無名火起:「我覺得佢已經改咗,所以我又少見咗佢呢一面。」

+8
心穎BB直認曾經因馬國明太淋善而無名火起。(陳順禎攝)

《深宮計》中後宮上至妃嬪、下至宮女都活在明爭暗鬥中,但心穎BB就指自己在娛樂圈中百毒不侵:「因為有咩事我都會出聲,我好記得我拍《學是學非》時,大家唔知喺度做乜等好耐,我就話點呀我哋依家等緊咩,我覺得唔係唔禮貌,係為咗個工作效率嘅而問,不過呢啲唔係人人都啱適合,做咗可能會孭鑊。」

入行6年最睇不過眼又是甚麼?心穎就指是工作時數:「但一直以來都係咁運作,可能嗰刻大家好辛苦,但係最後尾都係冇乜事,唔可以話睇唔睇得過眼,但係希望有改善。(馬國明嘅27.5小時係紀錄。)佢好捱得,佢係從來唔冧嘅人嚟。(你都得?)其實我都好捱得。」

經常笑臉迎人的心穎BB都有霸氣一面。(陳順禎攝)
+7