【幸福三重奏】大S徐熙媛夫婦接拍真人騷 汪小菲寵妻似足偶像劇
撰文：洪曉璇
出版：更新：
大S及汪小菲婚後育有一子一女。（微博圖片）
大S徐熙媛2010年下嫁汪小菲，先後誕下一對仔女，雖然5月初宣告流產，但一家四口亦好快走出陰霾，生活漸漸回歸正常軌道。6月27號係汪小菲37歲生日，大S除咗搶閘發微博送上生日祝福：「親愛的老公，生日快樂！願我們永遠都是相親相愛的死小孩！Love you！」最近兩公婆仲首次一齊接拍真人騷，實行將甜蜜互動公開人前。
大S搶閘貼圖祝老公生日快樂。（大S微博）
當年大S同汪小菲拍拖一個月就宣布閃婚，外界本是抱觀望態度，呢7年嚟汪生汪太以行動証明，更成為圈中模範夫妻。呢次佢地參與內地真人騷《幸福三重奏》，預告中大S喺屋內抹窗，挑皮地向玻璃呵氣，用手指畫上愛心，身在花園嘅汪小菲走埋嚟，吻向窗上嘅愛心；仲有大S一邊煮嘢食一邊餵老公，食燭光晚餐都要不時對望拖手，網友不禁話：「好似睇緊偶像劇一樣呀﹗」
預告片中大S於窗上呵氣畫心。（影片截圖）
汪小菲即刻走上前親親。（影片截圖）
育有一對仔女嘅大S同汪小菲，話已經4年半未單獨旅行，呢次趁住參與真人騷，被製作單位安排兩人到環境清幽嘅小屋一對一相處，24小時膩在一起，大S轉發預告片並喺微博留言話：「難得24小時都跟老公相處在一起！回想起來忍不住想笑！」
單係睇預告已經甜到漏。（影片截圖）
+5