【早霸王】男聽眾被老婆指搵個仔做傳聲筒 森美:我都明白

撰文:
最後更新日期:

森美今日好認真咁去聽同拆解男聽眾阿祖的問題。

每逢星期五,又到《早霸王》「你知道唔知道有人掛住你」環節,今期男主角阿祖同太太辦理離婚手續當中,但就想借《早霸王》箍煲,至於離婚原因,並唔係因為有外遇,而係受情緒病所影響。「我哋04年已經認識,到2012年結婚,經歷好多風風雨雨,但細仔出世後磨擦更多,自己去年尾有抑鬱,太太都有陪我睇醫生,亦証實我有抑鬱同焦慮,當時成日同太太講咁辛苦不同離婚,佢起初都好堅持一家人唔可以散,但後來都頂唔順。」阿祖指自己病發時會大喊、做任何事都提唔起勁,一年間轉了三份工。「一月中太太搬走,見到屋企啲嘢愈來愈少心都痛,但當時都覺得係自己提出(離婚)所以算,到佢真係搬走,個心係更痛,諗返好多以前開心或者唔開心嘅嘢,亦好後悔做呢個決定。」

佢認為要先醫好情緒病。

太太雖然同阿祖分居當中,但因為要照顧大仔,所以每日都會返回舊居,而阿祖之前有試叫仔仔提議一家人食糖水,可惜就被太太認為係「搵個仔做傳聲筒」,而太太亦曾向親友呻阿祖「得個講字無任何行動」。或者係因為曾經受過情緒病困擾,所以森美都十分理解阿祖的狀況。「用個仔做傳聲筒係因為講唔出口,我都明白,女人有時就係咁,你要哄佢,佢就會借啲易去腰潤,你試吓去捱,佢都真係辛苦,因為硬食你好多,佢忍你半年,你都要用返半年去令佢感覺到……你真係要令自己放開心個,醫好自己先,最後把口講到但做唔到,唔係因為你問題而係有病,病發係控制唔到自己,唔好放棄就得。」

森美曾受抑鬱症困擾3年。

為了挽救阿祖同太太的婚姻,森美接連兩次打電話,可惜都無人接聽(又無人聽!!)阿祖唯有在空氣中留言。「我哋識咗14年,經歷過高高低低,亦有兩個小朋友,離婚真係好痛苦,我唔可以無咗你,為你、為兩個仔,我會盡責任,以前錯在無擺你哋喺第一位,我會努力工作,將最好嘅生活比你哋。」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。