【美女廚房】十優港姐都唔係樣樣精 麥明詩八爪魚變香口膠
撰文：鄺鈺瑩
出版：更新：
麥明詩為求令菜式「全熟」同「可以入口」，煎雞扒時連火鎗都出動埋。
馮盈盈、麥明詩同吳若希於最新一集《美女廚房》中互鬥廚藝，麥明詩話晒都係十優港姐，加上又曾經在外國留學，以為佢會煮得一手好菜式，點知原來好一般，連美女學徙試食之後，都以「你嘅人生已經好完美」去修飾難食一詞。節目中，第一味指定菜式煮雞和蠔，麥明詩為怕出事，所以煎雞扒同時，更加入火鎗，非常誇張。之不過，搞掂啲雞，但就忽略咗啲蠔，更被蕭正楠嫌腥，麥明詩只能死撐話啲蠔係伴碟。
雖然麥明詩所煮的兩道菜都味道一般，但因為同場的馮盈盈同吳若希襯托，即時變得高貴。
之後在自選菜式中，麥明詩面對八爪魚都毫無懼色，更手起刀落分屍，過程驚險，不過最好笑係明明八爪魚已落鑊炒，但麥明詩聽到一眾來賓指「太大塊好難熟」後，即時將八爪魚起鑊切件。或者係因為見到同場吳若希生雞太恐怖，所以麥明詩以熟為原則，但最終八爪魚就因為炒得太耐而韌到似香口膠，試食時，連蕭正楠都提議大家直接吞，而麥明詩就表示係為了訓練大家的牙力。雖然十優港姐也有失手時，但由於同場的馮盈盈同吳若希廚藝更為不堪，令麥明詩最終勝出。
同場加映陳展鵬同女友單文柔一齊玩煮飯仔。