【深宮計.專訪】太醫仔林子超先天心有事:細個連體育堂都冇得上

撰文:陳栢宇
出版:更新:

林子超(Andy)在《宮心計2深宮計》中飾演奸到出汁的太醫學徒,他不但欺師滅祖送太醫袁文傑上絕路,更為黑魔后胡定欣在後宮做盡壞事,搞到好多觀眾都好想他不得好死。終於,大家最期待的畫面出現了,Andy在今晚(4日)播出的一集中,因為屢次犯錯而被安排出宮,臨行前以下犯上威脅定欣,搞到定欣視其為棄狠下毒手,惡有惡報!

欺師滅祖的林子超今晚(4日)被胡定欣毒死。(電視畫面)
+8

劇中,魔后定欣評Andy「一張油咀,一臉無辜」;現實中,他是「滿臉笑容,一身肌肉」。專訪當日,他不斷拎起啞鈴舉個不停,又上擂台同導師對打,與戲中的陰柔形象甚為不同。不過,他肌肉下的身體卻原來有先天疾病,鏡頭下他向記者展示心口上大約10cm長的疤痕:「我有先天性心漏,我細個P.E.堂都冇得上,我係典型體育堂坐喺場面嘅男仔,因為有醫生紙證明我有心臟病,我每年都要覆診一次。」雖然身體為他設限,但他從來沒有為自己設限:「我細細個就同屋企人講我好想跳舞,之後我就慢慢咁接觸運動。」

有先天性心漏症的林子超又跳舞又操大隻,可算是「冒死練肌」。(梁碧玲攝)

既然心臟有毛病,又怎樣克服到這個缺憾?Andy都覺得世事奇妙:「跳舞本身令到我Overcome到身體上好多問題。之後,我喺度諗我有冇可能變大隻。或者有人會覺得核突、唔襯,但係我想話畀人知,其實我都可以做到,日日跑步,而家一個月冇食飯,飯係咩味我已經唔知。」講到他的招牌大板牙,他即指自己曾經有諗過磨平磨細:「曾經都有人話太大隻、核突,但係後尾我諗清楚呢個都係我嘅標誌。」

我寧願奇怪,都唔想冇人記得,我諗我嘅奇怪都算係成功嘅。
林子超
林子超指練舞令他克服好多身體上的障礙。(梁碧玲攝)

Andy的演藝旅程,其實都可算是輾轉。考完會考後,Andy便入讀香港演藝學院修讀現代舞文憑,打算日後到無綫做舞蹈員:「不過我同時又好想試演戲,所以讀完文憑後,就想讀音樂劇,但因為屋企經濟方面唔許可送我去倫敦、紐約度讀,成個亞洲唯一一個地方可以讀音樂劇就係新加坡,所以就去咗新加坡。」讀了一年後他好便意識到做亞洲音樂劇演員生存空間好窄,所以回港試試參加now TV的主持選秀比賽:「之後公司打算請我,我喺度諗咁樣我就有份工,每個月有5數字收入,當時我21歲,學嘢有錢收,不如留返嚟香港,讀埋兩年音樂劇學士學位都未必有咁嘅機會。」

林子超曾入讀香港演藝學院,修讀現代舞文憑讀程,其後留學新加坡讀音樂劇,之後停學回港發展。(梁碧玲攝)

雖然舊公司夠穩定,但Andy不想自己被定型,所以就打算跳出框框:「做咗差唔多5年主持,慢慢覺得自己定咗位,但我一直都希望自己可以拍戲、拍劇。當時我25歲,我就覺得自己應該趁屋企壓力唔大時,出去闖一闖。舊公司叫我續約時,一續就續三年,我好驚我28歲時,冇呢個勇氣,到時可能唔想成為屋企人嘅負擔。」

試過成年零收入的Andy坦言曾一度諗過轉行做空少,但命運之手又把他拉回這個圈子:「渾渾噩噩咗一年後,有個監製搵我去TVB兒童節目教跳舞,因為呢個節目,一個幼稚園校長覺得我好啱教小朋友,就叫咗我教舞,令我繼續有返團火從事演藝工作。」提到他曾參選港男但不入圍,他即透露其時是剛剛開始在兒童節目教舞:「當時又瘦又白,我入唔到圍都係正常,純粹係試下。」到現在,他便因為與監製梅小青有緣,加入《深宮計》劇組。

【深宮計】太醫學徒林子超孖魔后胡定欣毒害後宮 為上位欺師滅祖

林子超坦言自己曾想過轉行做空少。(梁碧玲攝)

場地:DYNAGYM
教練:James Crudge
化妝:Yuki @YP Makeup & Hair Styling
髮型:Louis lam @Privatei
服裝:Dickies HK

+15