《美女廚房》方中信自爆拿手煮中菜 有意將廚藝傳授於女兒
撰文：賴家杰
出版：更新：
方中信（Alex）出席《美女廚房》節目錄影，Alex原來都好長時間冇入TVB，趁住未錄影之前提早到Tvb：「入到嚟去咗canteen食咗個雙餸飯。」除咗懷念TVB飯堂之外，Alex都直言擔心一陣節目食得唔飽，明顯有備而來喎！
方中信今晚出席《美女廚房》擔任嘉賓。（葉志明攝）
Alex對上一次上綜藝節目已經十幾年前，方中信話：「早前同蕭正楠食飯，佢就叫我上嚟玩下，我就覺得是但啦，反正最近都放緊假。」Alex當然都有留意呢一個節目，其實佢今日上嚟都話見到好大危機，「啱啱見到保安又拎滅火器，又急救箱，都驚驚哋。」
方中信今日上嚟呢個節目都表示有啲驚。（葉志明攝）
講開廚藝其實Alex自己都有少少心得，「我煮餸都Ok㗎，特別中菜啦，基本嘅自己都識得煮。」Alex女兒已經十歲，會唔會都開始傳授佢自己嘅拿手好菜呢？Alex回答：「佢識煎蛋嘅，但佢煎完個廚房就會好亂，等佢再大啲先啦。」