【體育世界】播映38年迎來終結　無綫裁員解散體育組

係人都知在香港做運動員搵唔到食，但估唔到就連做體育節目都不被重視，在裁員潮下會首當其衝成為犧牲品。日前已有報道指無綫會進行大裁員以精簡人手，節省開支，而播足38年的長壽節目《體育世界》一班員工就無得留低，體育組全組由30人被裁剩5人！而最後一集的《體育世界》於本周播出後，呢個節目就正式迎來終結。

《體育世界》的facebook專頁亦出了post同大家交代返件事，重溫一下昔日的集體回憶，最後提醒大家記得支持最後一集播出的節目，又叫大家幫手share呢個post。最搞笑是話：「有今生無來世，MyTVsuper無得重溫㗎」，真係想再睇都無㗎喇，臨尾就多謝大家一路的陪伴。而該組的一些前線員工也有於IG開post留言講感受，又上載了一組人以前的開心合照來留念。

《體育世界》facebook post詳情內容如下：

（請分享到你的FACEBOOK，陪著我們走到最後)
歡迎歡迎！歡迎收睇【體育世界】！
今日比較冷清d，得小編為大家主持

當個個都成日以為【體育世界】好耐之前就無咗，其實我哋仍然默默存在。
但嚟到今集【體育世界】，我哋真係正式大結局啦！
仲記唔記得我哋個首比「綠袖子」仲入腦嘅主題曲呀？
仲記唔記得細個嘅時候，一到周末就會坐係電視機面前睇住【體育世界】？
少年，你已經不再年輕了。

哎！傷心事唔講咁多！又暴露年齡
今集嚟到最後一集，話咁快嚟到尾聲，到咗最後嘅無獎問答遊戲時間，問題係：請列出最後一集體育世界中，最後出現嘅歷代主持名字。
（提示：片尾有彩蛋）

喂！係今日（7月7日）中午12點TVB【體育世界】呀！
聽聞片尾仲有彩蛋架！
有今生無來世，MyTVsuper無得重溫架，快d叫醒你個fd一齊睇啦！

p.s. 小編最後嘅小小請求，希望大家能夠share呢個post，係最後嘅最後有更多嘅人陪伴節目走到最後一刻。感激！

＃係彩蛋唔係流彈
＃鵰 
＃喂係個畫面有聲咋 
＃音樂嚟架咪諗錯隔離 
#直線又好曲線又好射得中咪得囉 
＃維護香港體壇發展嘅重要任務要交番畀各位啦
＃我完成咗劃時代意義嘅重要歷史性任務啦
＃工已收
＃請開啟你的電視機
＃來讓我們笑著欣賞這結局
 #UNOFFICAL要講明 ＃後會有期