【開心速遞】吳偉豪無後悔17歲放棄學業入行：早啲入嚟學嘢仲實際

當大家仲係20歲的時候，相信有唔少人依然探索緊自己喜歡同想做的事，而剛剛過了20歲生日的吳偉豪 (Ricco)，卻早就認清自己的目標，一心想要成為演員，發展演藝事業。Ricco加入無綫至今已3年時間，參與過好多演出，最重戲份當然是他於處境劇《愛‧回家之開心速遞》入面所飾演的朱凌凌，形象非常入屋，亦令他人氣急升。Ricco熱愛演戲，對於有人會問：「點解唔讀多啲書先？」Ricco說：「既然知道自己想做咩，不如早啲開始，就算讀埋大學，我都係會揀做演員呢條路，早啲入行學嘢仲實際。」

可以放膽去追夢，Ricco慶幸得到家人全力的支持：「屋企無咩負擔，無經濟上嘅壓力，家用係要畀嘅，爹地媽咪養到我咁大，無理由唔回報返佢哋。」Ricco爹地亦知道他真心鍾意演戲，所以當看到2015年無綫演員招募班的廣告時就叫Ricco去報名。Ricco話加入了TVB之後，大家都對他好nice好包容，自己亦沒有後悔過咁早放棄學業。

入行以來Ricco自言算是幸運的一個：「呢3年嚟我都有工開有嘢做，係期間試過有3、4個月無嘢做，雖然已經入咗劇組，但係要等出場，所以無嘢做，當時覺得好down，都有懷疑過自己係咪揀錯咗。不過到一拍返劇，團火就返晒嚟。」至於可有給自己幾多年時間在演藝圈創一番成績，Ricco說：「其實我入行無諗過要好紅，又或者要好多人識，有得演戲已經好開心，即使係做配角對我嚟講已經好好。」

熱愛演戲的他，自言捱夜都無問題，唔怕辛苦，只求有演出機會：「之前《是咁的，法官閣下》同《開心速遞》兩套劇一齊拍，好辛苦，我係一定要瞓喺張床度先瞓得着嘅人，所以嗰排無覺好瞓。喺訓練班嘅日子先係最辛苦，但又最開心嘅，我哋成班同學都好團結。」

作為TVB最年輕的小鮮肉，靚仔有型，Ricco得到幸運之神的眷顧並不令人感到意外，但其實他自己亦有努力爭取過的，絕非一味等運到。Ricco說：「我實習時會入廠睇人拍嘢，偷下師，畢業時都試過自己寫CV然後去敲啲監製房門，同佢哋自我介紹話：『我係28期嘅吳偉豪，如果有咩要幫手可以搵我㗎。』佢哋都會覺得好愕然㗎，但我自己就覺得做咗無壞嘅，做咗自己當時做到嘅嘢。我嗰時都有畀CV《是咁的，法官閣下》個監製陳耀全，佢有同我講返話認得我。去敲監製門畀CV之前我都有爭扎過，驚畀人話我好chur，自己又唔識同人吹水，唯有用呢個方法等人認識下我。我早前都有入去睇《大帥哥》拍攝，靠自己嘅觀察去消化同揣摩前輩嘅演技。」

場地提供：觀塘Penthouse Party

一齊睇下Ricco有幾咁吸引。