【掃毒2】陳家樂夢想成真與劉德華拍戲 ：發夢都見到佢！

人氣急升嘅男神陳家樂今日聯同衛詩雅出席運動品牌活動，二人今日現場更首次做DJ打碟，但表現如何呢？家樂回應：「其實本身以為好簡單，因為自己節奏感都Ok，又有玩開結他，點知行到去撳掣，點都唔啱音，又甩哂beat，勁難聽，好彩有另外一位DJ喺到幫我。」問番男神佢畀人有一種健康形象，佢平時會唔會都花好多時間去做運動？家樂回應：「自己好鍾意踢波，以前工作唔太忙嘅時候，一星期都會踢幾日，又可以同朋友聚會。」

自從人氣急升後，大大小小嘅活動都會見到家樂嘅蹤影，影視工作方面更成為搶手貨。家樂多次活動上提到劉德華係佢偶像，早前《東方華爾街》雖然華仔有份投資，但冇份拍攝，家樂與華仔合作拍戲嘅夢想只差一步，而宜家家樂嘅夢想終於成真，因為最近佢都有份演出由華仔同古天樂主演嘅《掃毒2》，家樂都講到拍攝並唔緊張：「拍攝期間好想快啲見到佢（劉德華），我番到屋企發夢都見到佢。」家樂講到能夠見到劉德華已經係佢嘅精神食糧。