【入住請敲門.專訪】莫竣名挑機泰國猛鬼酒店:轉身有白影衝埋黎

撰文:
最後更新日期:

ViuTV自家製節目《入住請敲門》安排主持人入住猛鬼酒店,去年播出第一輯後,男主持莫竣名即時被封為「沙膽哥」,第二季沙膽哥去到巫術盛行的泰國繼續犯禁挑機,除在酒店起壇招魂外,又試過在鏡房唱出惹鬼禁歌《夜夜痴纏》,就咁聽都覺得勁癲。由於走訪的靈探點大多已荒野,比起撞鬼,莫竣名笑言更擔心會遇見傻佬或劫匪。

對於有網友認為《入住請敲門》似造假,莫竣名就話:「咁好多人同我一樣都係睇唔到嘛。」(梁碧玲攝)

《入住請敲門》第二季挑機曼谷、芭堤雅同北碧府,走坊多間猛鬼酒店同靈探點,講到最有feel一站,莫竣名就首推曾發生運油車大爆炸的水門,他指當年爆炸發生於酒店正門,但新聞卻從未有堤及過,製作隊總係覺得有啲嚟。「我哋有逐層去睇,頂樓懷疑係總統套房,可能裝修到一半就停咗,所以空置咗,我行到某一個位時,突然有個白影衝埋黎,似係一層霧咁,自己都真係嚇一跳。」要知道,莫竣名於上季走訪台灣時,雖然見過紅鞋仔又聽過怪異笑聲,但就一直未見過「實體」,今次於漆黑中「遇見」白影,難怪連佢都話怕怕。

【入住請敲門】邦民女林婷日本另類住宿男神莫竣名泥濘見繡花鞋

莫竣名唱禁歌時有幾十個聽眾……

上一季《入住請敲門》,莫竣名曾在房在讀聖經挑機,今次他在曼谷猛鬼酒店,直闖伸手不見五指的ballroom,並邊唱電台禁歌《夜夜痴纏》邊敲打鏡子。他說工作人員設置好攝影機後已離場,剩他一人在ballroom,所以一開始確係幾驚。「有影相比師傅睇,佢話有幾十隻嘢圍住,但無惡意。」在泰國唱廣東歌挑機,是否因為唔啱channel所以平安渡過?反正莫竣名唱完歌之後瞓得好好。「因為間酒店係整個行程中最靚。」莫竣名說泰國拍攝很多時入住的地方都十分差,試過比蚊咬到無覺好瞓,返港後,未知是否因為缺乏休息而大病了一場。

於碎屍案的別墅拍攝時,莫竣名在介紹環境時連番被嚇到爆粗。旁邊的女性用品疑為之前有人曾用作拜鬼。

曼谷過後,莫竣名一行人去到渡假勝地芭堤雅,不過他入住的並非什麼高級resort,而係又殘又舊的賓館。他說早年曾有人妖被兩兄弟錯手殺死,並藏屍於床架中,一對情侶其後入住,一覺醒來發現地上全是血,才揭發命案。莫竣名形容該房非常簡陋,連被鋪也是溶溶爛爛,他特意將冷氣調高,用外套蓋著便入睡,但卻一直感到冷冰冰。「我哋book咗三間房,我揀咗最核突、大家都唔願意住嗰間,除聽到怪聲之外,當晚就比鬼壓,我第一時間係睇吓部攝影機仲有無電,因為如果唔係就嘥咗。」都唔知話佢係專業定癲好。一行人之在芭堤雅又挑戰了曾發生碎屍案的別墅,擁有敏感體質的攝影師Jer仔在屋內見到有影行來行去。提到Jer仔,他與莫竣名簡直是沙膽二人組,一個時運高一個易見到「污糟嘢」,莫竣名笑言有時睇Jer仔其實仲好睇。

 

場地提供:HMV Kafé

自《入住請敲門》後,莫竣名工作量大增,最近跟與經理人開設了時裝店。問他是否有意繼續做類似節目,他說連首屈一指的泰國都已經挑戰過,所以要好好考慮。(梁碧玲攝)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。