【BB來了】李佳芯演媽媽情緒起伏好入戲 生仔似走過鬼門關無誇大

撰文:
最後更新日期:

生仔真係好似喺鬼門關前走一圈。(影片截圖)

十指痛歸心,當夾手指都係得5級痛,生仔十級痛真係非正常人能想像,就算唔係順產唔使經歷陣痛,無端端俾人剖腹再縫返七層皮肉,嗰種滋味真係諗起都驚。TVB新劇《BB來了》入面,Ali明明未為人母,卻能演活將孕婦情緒起伏心路歷程,由剛有孕到入手術室生BB,整個過程血淋淋呈現喺觀眾眼前,見到Ali喊住問醫生:「係咪我做錯啲咩嘢整到BB,點解會咁嘅?」唔少觀眾邊睇邊同佢一齊默默落淚。

懷孕期間孕婦對腳好易水腫,企得耐行得耐都會易攰。(影片截圖)

【BB來了】女強人忽然Bingo做媽媽 李佳芯忐忑心情網友讚有共鳴

預產期前一周,Ali忽然下體出血,醫生檢查時惶恐不已。(影片截圖)

Ali去完公司Party忽然下體出血,醫生檢查後告知,子宮出血情況似胎盤剝落,會影響輸血同營養俾BB,嚴重起嚟可能會胎死腹中。陀住BB十個月血脈相連,忽然被告知可能無法順利出世,Ali情緒完全爆發出嚟,不顧靚樣崩潰濠哭:「係咪我做錯啲咩嘢整到BB,點解會咁嘅?」其實胎盤剝落可以係原因不明,100位孕婦中1位有機會遇上,即係莫需有,點會唔傷心。

知道BB有機會出事,準父母心情難以用言語形容。(影片截圖)

【BB來了】李佳芯盧苑茵展婆媳大戰 新抱奶奶永遠睇對方唔順眼?

唔想剖腹唔一定係因為貪靚,而係怕坐月時難以照顧BB。(影片截圖)

+3
+2

劇中Ali懷孕期間,小心飲食勤於做運動,目的就係令肚內BB健康成長得嚟唔好過重,順產時無咁辛苦。點知遇上意外情況需要緊急開刀,九個月以來嘅努力完全白費,Ali都扁咀喊晒咁嗌:「唔好啦我咁努力做帶氧運動,就係想順產呀嗎。」或者大家覺得佢太唔理智,只係貪靚唔想留有疤痕,但順產剖腹只係先苦後甜同先甜後苦之分。順產經歷十級陣痛後生完一日已經行得走得,而剖腹傷口可以痛成個月,進補又要延遲,仲無咁快可以上奶,而且有咩閃失隨時會令子宮爆裂有性命危險﹗

要獨自面對生產過程,真係好驚架。(影片截圖)

入手術室剖腹就係咁嘅情況,經歷過嘅媽媽都話超寫實。(影片截圖)

私家醫院生BB雖然有較好照顧,順產開刀老公都可以陪產,但緊急開刀手術就只能獨自面對。Ali瞓喺病床上被推去手術室,未知自己同BB生死,老公黎諾懿又未能陪伴左右,喊到生離死別一樣,經歷過嘅媽媽觀眾都話,真係一啲都無誇張。瞓喺手術室望住盞燈,打咗麻醉針個人不受控地震,雖然無痛感但FEEL到醫生一層一層劏開自己個肚,又唔知BB情況,真係非常無助架。

真係要兩個只能活一個,媽媽們都一定會保住小朋友為先。(影片截圖)

BB出咗世大家就以為有好日子過咩?完全錯晒啦﹗剖腹後麻醉藥過晒傷口開始痛,姑娘入嚟塞藥到肛門好似無晒尊嚴一樣;第一次落床時,Ali同黎諾懿見到成班媽媽喪屍出籠一樣,忍痛都要行落床去見BB一面;成班媽媽圍住學餵人奶要坦胸相對,姑娘出手糾正,未上奶俾BB啜到乳頭損晒,以上種種都係永世難忘。女觀眾話有共鳴,就算男觀眾都話睇完要孝順媽媽,就知道劇情係幾咁寫實啦。

喪屍出籠呢幕,去到每間醫院產後房嗰層都唔難見到。(影片截圖)

無預境下被塞藥,呢個反應真係好正常。(影片截圖)

荷爾蒙影響下,孕婦面對奶奶挑機好易情緒激動。(影片截圖)

被逼坦胸學餵奶,兼俾BB啜到損晒,真係似隻乳牛多過似人。(影片截圖)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。