「慳妹」衛詩雅拍通宵唔夠瞓 堅持搭巴士:坐的士三百幾蚊好貴

撰文:
最後更新日期:

衛詩雅在新戲《笑林寺》會與農夫有感情綫。(葉志明攝)

《笑林寺》一睇個戲名就知係喜劇,又有「方丈」大師劉以達,以及一對孖寶兄弟農夫在新戲演出,甚具娛樂性,衛詩雅在戲中與農夫有感情線,最後同陸泳開花結果。衛詩雅擔心話:「我一知道呢套戲要同農夫拍對手戲,同自己講呢次死緊啦,當我見到佢兩個,未對劇本未做對手戲,已經畀佢地兩個攪到我笑唔停,本身我個角色好cool,到時埋位拍攝我都唔知點算好,佢地兩個講到明,到時唔會跟劇本做,如果係咁樣做,我咪接唔到囉,呢次真係睇到時佢地兩個點樣整蠱我,真係有啲擔心。」

衛詩雅擔心同農夫做對手,怕畀整蠱(葉志明攝)

衛詩雅出名「慳妹」,曾經有段長時間沒有戲拍,試過零收入所以學會節儉。「雖然近呢幾年多咗工作,多咗收入,但我從來冇改變過,一樣搭巴士,前幾日拍通宵戲,冇瞓過覺,返屋企沖個涼,一樣咁堅持搭巴士,跟住出門口,驚過時間,跑住出去,上到巴士,可能唔夠訓,個人暈暈地,個一刻真有啲驚。」衛詩雅被問到當刻乘坐的士需要多少車費?「好貴,需要3百幾蚊,距離我屋企好遠,冇咁嘅必要,我都唔會搭的士,自己雖然好攰,叫我訓多一個鐘,就冇咗差不多四百蚊,我唔捨得,因為好多人一日嘅工資都冇四百蚊,所以對我來講係好多。」大家聽到詩雅咁講,相信係好多男人心目中理想情人。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。