【有錢真係為所欲為】鄭子誠8年前舊作突爆紅 國內手遊邀拍廣告

撰文:
最後更新日期:

呢張Cap圖相信不少人手機都有。

「Sorry,有錢真係大晒,不過我諗佢唔會明呢個意境。」呢句喺TVB劇集《讀心神探》第17集入面嘅對白,原來唔止香港觀眾,連大陸網民對呢句對白一啲都唔陌生。最近大陸一間遊戲公司就邀請鄭子誠同梁健平去到上海拍廣告,重現經典。

梁建平、鄭子誠一齊被邀到上海拍手遊廣告,重現《讀心神探》造型。

鄭子誠嘅奸樣加埋呢句「抱歉,有錢是真的能為所欲為的」嘅Cap圖,簡直風靡網絡世界。網上更加有解釋呢張Cap圖嘅正確用法,包括:當看到有錢的個人或組織為所欲為時、當看到有錢任性的言論或行為時,同官方推出的破壞遊戲平衡的新角色或卡牌等,相當趣怪。

廣告草圖仲被網民找出來,制作相當認真。

鄭子誠其實憑靚聲及演繹奸角出神入化而一直備受香港網民欣賞,但今次紅到返大陸,連鄭子誠都話估唔到,他接受《香港01》訪問時,說:「今次係完全冇預計到,會突然之間唔知點解會喺內地紅起上嚟,甚至乎我一直都不知情,直至到好幾個月之前,有一次我喺街上面拍緊外景,咁突然間有一對內地嘅朋友旅行,話想同我影相,咁我都幾驚訝,『點解你會識得我嘅呢?』咁佢就同我講『你知唔知你嘅表情包喺內地好紅呀?有錢就可以為所欲為呀,呢一句說話。』咁我先開始慢慢去睇返,究竟咩事情發生。首先知道7年前《讀心神探》呢套劇裏面,其中一場戲嘅其中一句說話就係『有錢可以為所欲為』,突然之間唔知點解會喺內地紅起上嚟,就好多人都用呢一個嘅表情包。咁今次返上海,其實就係幫內地一個頗大嘅手遊(手機遊戲)公司,就食住我同健平(梁健平)嘅呢條片,就同佢一齊拍廣告嘅。咁至於內地嘅影迷熱唔熱情呢,其實我就唔係太知喇,今次拍攝嘅過程都幾緊湊,我哋一落機就做採訪,跟著就第日已經要開工,一拍拍成日,拍完之後就走喇。咁所以我基本上全部都喺室內進行,好少接觸到外邊嘅人,至於會唔會返內地發展,呢個就完全唔係我哋控制得到嘅事嚟嘅,咁嘛暫時就冇呢個計劃啦,因為我哋做演員永遠都係被動嘅東西嚟嘅,但係有機會開拓自己,喺內地嘅一啲知名度同埋時常呢,都係一件好事嚟嘅,不過最重要嘅一樣嘢,就係我要好積極地要學習返嗰啲普通話喇,因為我啲普通話真係非常之普通嘅。」

其實除咗呢句,鄭子誠亦創下唔少經典對白,一齊重温下啦。

+9
+9
+9


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。