陳潔玲放低生意碌保齡 索爆細妹有無興趣入行？
撰文：洪曉璇
出版：更新：
雖然少咗喺幕前演出，不過陳潔玲都Keep住相當Fit。（陳潔玲IG）
今屆香港小姐選舉正進行得如火如荼，成功入圍嘅20名佳麗變髮示人，最終邊個能夠突圍而出仲要睇嚟緊嘅表現，但唔少網民開始回帶，搵返近年一啲非三甲滄海遺珠，好似2012年參選港姐，有「翻版陳妍希」之稱嘅陳潔玲（Christy），約滿TVB後最近專注生意發展。呢日抽空同妹妹到西貢碌保齡，原來妹妹都相當上鏡喎﹗唔知有無興趣入行呢？
陳潔玲近來忙於做生意，之前喺網上呻買咗一堆泳衣都無機會著。（陳潔玲IG）
又邊個會諗到，Christy咁大個人竟然係第一次打保齡。
離開TVB後Christy拍咗套《私人會所》，依家就將時間都放晒喺影樓及Party Room生意：「同時兼顧兩盤生意，需要嘅精神時間係超出我想象。拍戲同做生意都一定係團隊合作，唔會自己一個做晒，但演員好多時係參與一個團隊，但做生意就係我去帶領團隊，個壓力係大好多倍。但無論如何，我始終都係一個演員，亦會渴望再次參與唔同嘅製作，喺幕前世界一定會再同大家見面。雖然暫時未有時間，亦未有合適劇本，但我會努力更新我嘅社交平台，始終時代唔同咗，平台同媒介亦唔再局限，大家有嘢同我講隨時都可以架。」
Kitty企喺家姐隔離都毫不失色好上鏡，不過Christy就話妹妹已為人妻，無興趣入行啦。
呢日Christy終於肯休息一下，孖住妹妹Kitty到西貢，唔係遊船河唔係食海鮮，反而去左打保齡。睇真啲Kitty都相當上鏡，外表斯文大方，被問到會否考慮介紹妹妹入行，Christy未示無此打算，事關妹妹原來已為人妻，專心做家庭煮婦相夫教子。
Christy成日上載男友視角相片，唔知幾時先搵到個真命天子幫佢影呢？（陳潔玲IG）
俾妹妹爬頭結婚，Christy又會唔會開始心急呢？「其實都恨嘅，點會唔想拍拖，但都係隨緣啦。（即係有人追？揀緊？）叫得做空白，係因為冇，所以我係只能夠專注做生意。其實我好宅，生活圈子好細，識唔到人，睇下我多啲嚟碌齡，可唔可以識返個保齡王子。」
+5