【逆流大叔】胡定欣洗甩「電視味」多謝一個人:因為鎮宇哥喺度!

撰文:
最後更新日期:

2018年可算是胡定欣豐收的一年,兼且涉獵甚廣,繼《宮心計2深宮計》外,更有劇集的主題曲《無悔無愧》、同時也有她首度嘗試舞台劇的《偶然.徐志摩》、當然不少得是吳鎮宇與她合作的《逆流大叔》,全部兼獲一致好評。今年可算是胡定欣,歌影視舞的一年。

今年真係胡定欣真係有好多嘗試。(林迅景攝)

到底這4樣範疇之中,胡定欣最愛的是甚麼?胡定欣接受《香港01》訪問時回答:「我從來都覺得,我想多元化發展,因為當我試過電影同舞台劇之後,我嘅得著係互相影響。當我拍返劇嘅時候,我諗嘅嘢可能有所唔同,又或者將拍劇嘅諗法帶返去舞台或者電影,其實係一個正面嘅影響。(4樣嘢入面揀一樣呢。)冇得揀一樣,哈哈哈。」

《逆流大叔》入面嘅胡定欣又有另一種味道。

有不少人看畢電影《逆流大叔》後,均稱讚胡定欣「洗甩咗陣電視味」,胡定欣就表示要歸功於戲中的對手吳鎮宇。「我拍嘅戲份喺三日入面完成,(其實)我冇刻意做過啲乜,都係順住自己感覺去,我諗可能有鎮宇哥喺度掛,佢對我影響都幾大。我喺電影圈都係一個新人,我都係將我拍劇經驗帶到去一個新環境,所以我都好希望呢一步之後,有第二步第三步。」

胡定欣話晒都係電影界新人,真係好有新鮮感。

談到電影界前輩鎮宇哥,胡定欣就說:「雖然識咗十幾年,其實都只係合作過2次。我記得佢喺一個訪問入面講過,話最起碼我唔驚佢先。佢(吳鎮宇)話我(胡定欣)有啲咩都見過晒,佢有咩脾氣我都清楚,已經減少咗個隔膜。(已經同吳鎮宇同個Level?)唔可以咁講嘅,我好多謝佢一路都留意我演出,同埋鎮宇哥搵我拍戲,對我嚟講已經係一個肯定。」

胡定欣未有離巢發展嘅打算。(林迅景攝)

2018年先後有多位藝人離巢發展,兩屆視后的胡定欣有否打算出外尋找更多機會?胡定欣:「現階段我冇諗呢樣嘢。你都見到我有拍舞台劇或者電影,總之有適合嘅演出機會我都會嘗試。無論邊一個製作單位,邊一個地方,我相信公司都唔會限死我。畢竟我唔係一個新人,我喺呢間公司已經做咗16年,有適合而我又想做嘅嘢,我都會嘗試。(最想同邊個合作?)其實好多喎,張家輝,我係好想同佢合作,其實青雲、古仔,同埋鎮宇哥都好想繼續合作。」

+16
+15
+14


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。